NUREKSAIN SESURATAN PASANG AKSARA BALI RING SAJERONING PAPAN WASTA SANE WENTEN RING SD SE- KECAMATAN JEMBRANA

Transkripsi

1 NUREKSAIN SESURATAN PASANG AKSARA BALI RING SAJERONING PAPAN WASTA SANE WENTEN RING SD SE- KECAMATAN JEMBRANA Ni Luh Putu Mei Aryantini, M. Sri Indriani, I. B. Md. Ludy P. Jurusan Pendidikan Bahasa Bali UniversitasPendidikanGanesha Singaraja KUUB Tetilik puniki matetujon nelatarang indik (1) sukating aksara Bali, (2) kaiwangan sesuratan Pasang Aksara Bali miwah (3) kawentenan ringkesan ring papan wasta SD Se-Kecamatan Jembrana. Jejering tetilik inggih punika sesuratan. Panandang tetilikannyane inggih punika papan wasta. Tetilik puniki nganggen palihan tetilik deskriptif kualitatif lan nganggen kramaning pratiaksa miwah kramaning dokumentasi. Data tureksa sane kaanggen minakadi: (1) milihin data (reduksi data), (2) nyelehin data (identifikasi data), (3) interpretasi data miwah (4) tetingkesan. Pikolih ring tetilikan puniki (1) sukating aksara Bali ring papan wasta kantun wenten sesuratan aksara Bali sane nenten nginutin sukat/sukating aksara Bali minakadi: ulu, pepet, surang, taleng/taling, tedong, suku, bisah, adeg-adeg, gantungan ta, gantungan da, gantungan ja, gantungan ka, suku kembung, guwung, carik siki miwah carik kalih. (2) kaiwangan pasang aksara Bali ring sesuratan papan wasta kantun akeh kapanggihin kaiwangan ri sajeroning nyurat kruna miwah lengkara yening selehin nginutin Pasang Aksara Bali taler sampun wenten sesuratan sane nginutin Pasang Aksara Bali lan (3) kawentenan ringkesan ring papan wasta SD Se-Kecamatan Jembrana kantun kapanggihin sesuratan ringkesan puniki yening selehin wenten sane durung nginutin Pasang Aksara Bali. Tetilik puniki nyantenang kantun akeh pabinayan indik sukating aksara Bali miwah Pasang Aksara Bali. Saking tetilik puniki kaaptiang parajana Bali sayan urati indik kawentenan sesuratan pasang aksara Bali lan majeng ring panilik lianan mangda nincapang malih indik tetilikan sane mapaiketan sareng sesuratan Pasang Aksara Bali ring papan wasta. Kruna jejaton: pasang aksara, papan wasta, sukating. Abstract This research was aimed at describing (1) the font size of Balinese letters used in Balinese writing, (2) the errors in the Balinese writing and (3) the abbreviations that occur in the name sign of elementary schools in Jembrana Regency. The subject of this research was the article. Meanwhile, the object of this research was the name sign. This study was designed as descriptive qualitative research and the data collection process was conducted by using observation and documentation method. The data analysis method used was descriptive qualitative method with some phases: (1) data reduction, (2) data identification, (3) data interpretation (4) conclusion. The result of this research showed that (1) there were still some Balinese letters used in the Balinese writing of the name sign of elementary school in Jembrana Regency that did not follow the rule of Balinese letters writing, namely sukating aksara Bali such as: ulu, pepet, surang,

2 taleng/taling, tedong, suku, bisah, adeg-adeg, gantungan ta, gantungan da, gantungan ja, gantungan ka, suku kembung, guwung, carik siki and carik kalih., (2) there were still some errors that occurred in the Balinese writing of name sign of elementary school in Jembrana in terms of words and sentences errors if analyzed using Balinese letters writing rules and (3) there were still some errors in abbreviation writings in the name sign of elementary schools in Jembrana Regency if analyzed by using Balinese letters writing rules. This research is expected to be able to make Balinese people pay more attention on Balinese letter writing in the name signs of any institutions and it is expected that this research will be followed by other researches regarding Balinese letter writing in name signs. Keywords: font size, letters, name signs. PURWAKA Basa inggih punika dados srana mabebaosan, srana sane kaanggen malajahin kaweruhan, srana sane kaanggen ngunggahang pepineh kreatif, srana sane kaanggen udeg utama rikalaning nureksain cakepan, srana sane kaanggen basa Nasional, Persatuanlan Negara (Achmad, 2015: 16). Salanturnyane, Antara (2008: 9) nelatarang basa sakadi srana mabebaosan madue kawigunan wenten petang soroh, inggih punika (1) kawigunan anggen nekedang isin pabesen, (2) kawigunan anggen ngawetuang daging manah, (3) kawigunan anggen manyama braya sareng krama banjar, lan (4) kawigunan anggen maparilaksana becik nganutin adat sane wenten ring krama Bali. Saking panelatarang baduur prasida kacutetang basa inggih punika piranti sane kaanggen rikalaning iraga mabebaosan sareng jadma sane lianan miwah kaanggen iraga manyama braya. Ring paplajahan basa wenten sane kawastanin basa Ibu silih sinunggilnyane inggih punika basa Bali. Basa Ibu inggih punika basa sane sampun kaanggen saking dumun olih krama Bali sane lumrah tur pinaka basa sane kapertama wenten ring Bali. Basa Bali nenten prasida kapalasang sareng krama Bali tur basa Bali pinaka silih sinunggil budaya Bali.Basa Bali sane pinaka budaya Bali patut lestariang tur kaanggen ring sekancan wewidangan Bali, mangda prasida mamargi sinarengan sareng panglimbak budaya Bali. Sangkaning plestarian budaya Bali puniki, ring sekolah sampun wenten paplajahan indik basa Bali sane ngawit saking SD, SMP, taler SMA/SMK. Basa Bali taler kaplajahin ring perguruan tinggi mangda kawentenan basa Bali prasida kajaga klestariannyane. Ring basa Bali wenten parikrama nyurat. Nyurat inggih punika parilaksana sane madue genah pinih utama anggen ngwedarang daging kayun (Djuhari lan Suherni, 2001: 121). Panampen punika nenten jangkep yening kaanggen sepat siku-siku, dadosnyane wenten panampen sane lianan inggih punika Dalman (2015: 1) nelatarang nyurat inggih punika parilaksana anggen ngwetuang rasa sane marupa sesuratan sane kapolihang olih sang sane nyurat. Manut panampen sane sampun katlatarang, madue unteng nyurat inggih punika, parilaksana sane madue genah pinih utama anggen ngwedarang rasa miwah daging kayun. Basa Bali kasurat antuk aksara Bali. Tinggen (1993: 1) basa Bali prasida kasurat kalih soroh aksara inggih punika nganggen sesuratan aksara Bali lan sesuratan aksara

3 Latin. Sesuratan aksara Bali madue paiketan sareng Pasang Aksara Bali, saantukan yening nyurat aksara Bali sane nenten manut prasida ngwetuang artos sane langkung saking asiki kruna lan suksman, imbanyane sakadi aksara asta sane dados maartos kutus miwah gajah. Lian ring punika kaweruhan pasang aksara Bali becik kaanggen nilikin ring sajeroning sesuratan aksara Bali. Tinggen (1966: 5) nelatarang aksara Bali mawit saking India. Ring India wenten aksara Kuna sane kawastanin aksara Dewanagari lan aksara Pallawa sane kawentenannyane ring India kelod. Makakalih aksara puniki salanturnyane wenten ring Indonesia inggih punika ring Jawa lan Bali. Ring Bali aksara Pallawa puniki kaanggen nyurat Basa Bali Kuna lan Sansekerta. Salanturnyane, ring Jawa punika wenten aksara Pallawa sane kawastanin aksara Semi Pallawa. Ring jaman Kediri, rupa aksara Pallawa ngamolihang pobahan, inggih punika dados merpat lan kawastanin aksara Kediri Kwadrat. Saking Aksara Kediri Kwadrat punika salanturnyane wenten pobahan inggih punika dados aksara Jawa lan Bali. Yening rupa aksara Bali punika bunter sakadi napi sane mangkin kaplajahin ring sekolah taler ring perguruan tinggi. Aksara Bali punika madue uger-uger sane mabinayang sareng aksara-aksara sane lianan minakadi aksara Latin. Ri kala nyurat aksara Bali manut cara silabik utawi wanda kruna, yadiastun durung polih wewehan utawi pangangge suara, aksara punika sampun mrasidayang ngwangun kruna bapa=bp. jaja =jj. miwah nyama = zm. sane maartos siki aksara punika sampun madue siki suku kata. Nanging yening sesuratan aksara Latin manut cara fonemis, inggih punika siki aksara madue siki suara manten. Aksara Bali inggih punika srana sane utama mangda ngajegang budaya Bali.Aksara Bali puniki madue kawigunan inggih punika nyurat sakancan pikobet agama, adat-istiadat miwah sane lianan. Mangkin yening pacang nganggen aksara Bali sane becik, patut iraga nguratiang uger-uger nyurat aksara Bali.Uger-uger puniki lumrahnyane kasengguh ejaan. Ejaan inggih punika samian ugeruger sane kaanggen rikalaning nyurat suara basa, kruna, lengkara sane nganggen pralambang sane patut. Ring Bali, uger-uger punika kawastanin pasang aksara. Pasang aksara Bali inggih punika uger-uger ring sajeroning nyurat basa Bali antuk aksara Bali (Medra dkk., 2002). Uger-uger punika minakadi pangangge ardasuara, pangangge tengenan, rangkepan wianjana, nyurat kruna lingga tigang kecap, nyurat aksara madwita, nyurat pasang pageh, aksara anceng miwah sane lianan.punika sane ngaryanang akeh sane nenten seneng yening nyurat aksara Bali.Nanging mangkin iraga dados krama Bali patut ngajegang Bali.Yening kaplajahin, basa miwah aksara Bali pastika punika nenten meweh.sane ngaryanang meweh punika ngamanahin praraga mangda prasida malajahin basa Bali inggih punika nyurat aksara Bali. Nyurat aksara Bali punika nenten ja ring buku, lontar miwah sane lianan. Nanging akeh mangkin wenten sesuratan aksara Bali ring papan wasta sane wenten ring desadesa utawi banjar-banjar. Sesuratan punika wenten ring papan wasta minakadi papan sane wenten ring sekolahan, kantor Kepala Desa, pura miwah sane lianan. Mangkin iraga dados krama Bali patut nguratiang mangda sesuratan punika becik kwacen lan kacingak.

4 Akeh sesuratan sane nenten manut ring uger-uger nyurat aksara Bali minakadi genah cecek, adeg-adeg miwah sane lianan punika patut kauratiang. Tinggen (1966: 30) kawentenan pedoman sesuratan papan wasta nganggen aksara Bali olih sekaa penyusun inggih punika marupa lanturang laksana saking SKP.Gubernur tanggal 22 Mei 1996 nomor 172/1996. Sesuratan papan wasta nganggen aksara Bali prasida kabinayang antuk kalih genah kawigunannyane inggih punika wewidangan adat (pura, bale banjar, wasta sekaa truna-truni, miwah sane lianan) lan wewidangan anyar (restoran, hotel, wasta margi, wasta sekolah, genah-genah wisata miwah genah sane lianan). Tinggen (1966: 30) ri kalaning nyurat papan wasta nganggen wewidangan adat akehan nganggen Pasang Aksara Purwadresta inggih punika nganggen basa Bali, aksara Bali miwah ring sor aksara Bali punika kadagingin aksara Latin (dwi aksara). Tinggen (1966: 31) ring wewidangan anyar aksara Bali kaanggen nyuratang pralambang suara basa Indonesia utawi basa dura negara. Ring papan wasta basa Indonesia, madaging aksara Latin, ring sor aksara Latin punika wau madaging aksara Bali (dwi aksara). Saking panelataran baduur prasida kacutetang yening sesuratan aksara Bali sane wenten ring papan wasta ring wewidangan adat lan anyar punika malianan genah aksara Latin lan aksara Balinyane. Sesuratan Dwi Aksara punika sampun kalaksanayang ring sajeroning wewidangan desa sane wenten ring Bali. Imbanyane sakadi ring wewidangan anyar, SD ring Bali mangkin sampun akeh sane madaging sesuratan dwi aksara ring papan wastanyane, nanging akeh masih sane nenten madaging. Panilik sampun nglaksanayang pratiaksa inggih punika ring SD se- Kecamatan Jembrana. Ring Kecamatan Jembrana punika wenten 4 kelurahan lan 6 desa. Ring soang-soang kelurahan lan desa punika wenten SD sane akehnyane 32 SD. Ring papan wasta punika akeh kaiwangan sane nenten nginutin pasang aksara lan pasang pageh. Lian ring punika, wenten taler SD sane papan wastanyane nenten madaging sesuratan dwi aksara. Sane sampun madaging puniki mawinan sampun wenten gatra saking kepala sekolah mangda papan wasta sane sampun sue punika kagentosin nganggen sane anyar inggih punika sesuratan dwi aksara miwah SD punika nyarengin pacentokan mangdane papan wasta punika madaging sesuratan aksara Bali sane nyihnayang ajeg Bali. Lian ring punika wenten SD sane nenten madaging sesuratandwi aksara punika mawinan durung wenten gatra saking kepala sekolah mangdane nagingin sesuratan dwi aksara, kawentenan sisia sane kidik miwah kakirangan jinah anggen makarya papan wasta dwi aksara punika. Manut napi sane sampun katelatarang baduur, panilik meled ngambil sesuratan aksara Bali sane wenten ring papan wasta kaanggen tetilikan. Panilik meled nilikin tetilikan puniki mawinan akeh sesuratan aksara Bali ring papan wasta punika sane kari iwang, akeh pasang aksara lan pasang pageh sane nenten manut. Tetilikan puniki boya ja tetilikan sane kapertama ngenenin indik sesuratan pasang aksara Bali. Tetilikan sane pateh sampun naanin klaksanayang sadurungnyane, sakadi: (1) I Komang Agus Dedy Pradnyana (2015) sane nilikin indik Seseleh Sesuratan Aksara Bali ring Pupulan Lontar sajeroning Pacentokan Nyurat Lontar Jurusan Pendidikan Bahasa Bali Undiksha Warsa Tetilikan I Komang Agus Dedy Pradnyana puniki malianan sareng tetilikan sane jagi

5 kalaksanayang mawinan tetilikan I Komang Agus Dedy Pradnyana nilikin indik sesuratan aksara Bali ring pupulan lontar pacentokan nyurat lontar, nanging tetilikan puniki nilikin sesuratan pasang aksara Bali sane wenten ring papan wasta. (2) I Komang Ada Saputra (2015) nilikin indik Seseleh Sesuratan Aksara Bali ring Lontar Satua Siap Badeng manut Pasang Aksara Purwadresta saking Pasamuhan Agung Alit Basa Bali Warsa Tetilikan I Komang ada Saputra puniki nyelehin indik sesuratan aksara Bali ring lontar satua siap badeng manut pasang aksara Purwadresta saking Pasamuhan Agung Alit Basa Bali Warsa Malarapan antuk napi sane sampun katlatarang baduur, panilik meled nglaksanayang tetilikan sane mapaiketan sareng aksara Bali. Manut sakadi punika panilik meled nglaksanayang tetilikan sane mamurda Nureksain Sesuratan Pasang Aksara Bali ring Sajeroning Papan Wasta sane Wenten ring SD Se-Kecamatan Jembrana. Kaaptiang mangda napi sane kapolihang saking tetilikan prasida kaanggen dasar utawi sesuluh miwah wit pabesen kaanggen majeng ring sang sane ngwacen. Sakadi sane sampun kabaosang ring dadalan pikobet prasida kacutetang pikobet inggih punika (1) sapunapi sukating aksara Bali sane wenten ring sesuratan aksara Bali ring papan wasta SD se- Kecamatan Jembrana? (2) sapunapi kaiwangan Pasang Aksara Bali ring sesuratan papan wasta SD se- Kecamatan Jembrana? (3) sapunapi kawentenan ringkesan ring papan? Manut bantang pikobet baduur, tetujon tetilikan puniki inggih punika (1) mangda prasida uning lan nelatarang sukating aksara Bali sane wenten ring sesuratan aksara Bali ring Jembrana, (2) mangda prasida uning lan nelatarang kaiwangan sesuratan Pasang Aksara Bali ring sesuratan Jembrana lan (3) mangda prasida uning lan nelatarang kawentenan ringkesan ring papan wasta SD se- Kecamatan Jembrana. KRAMANING TETILIK Wenten makudang-kudang kramaning tetilik sane pacang katelatarang inggih punika: (1) palihan tetilik, (2) jejering miwah penandang tetilik, (3) Parikrama mupulang data, (4) pranti tetilik lan (5) data tureksa. Palihan tetilik inggih punika tata cara mupulang data lan ngamolihang data. Wendra (2013: 32) nelatarang palihan tetilik inggih punika naya sane ngardi genah tetilik sumangdane panilik prasida ngamolihang data sane patut sane adung sareng karakteristikvariabel miwah tetujon tetilik. Palihan tetilik sane kaanggen ring tetilikan puniki wantah palihan tetilik deskriptif kualitatif. Zuriah (2009: 94) nelatarang data sane nganggen tetilikan deskriptif kualitatif, kawedarang nganggen kruna-kruna lan narasi ri kala nureksain data. Jejering ring tetilikan puniki inggih punika sesuratan. Panandang tetilik inggih punika papan wasta. Kramaning sane kaanggen mupulang data inggih punika kramaning pratiaksa (observasi) lan kramaning dokumentasi. Piranti tetilik sane kaanggen ring sajeroning tetilikan puniki inggih punika kartu data. Kartu data ring tetilikan puniki katureksain nganggen teknik deskriptif kualitatif. Manut Sugiyono (2006: 155) nelatarang indik kawentenan undag-undag data tureksa inggih punika: (1) milihin data (reduksi data), (2) nyelehin data (identifikasi data), (3) interpretasi data miwah (4) tetingkesan.

6 PIKOLIH MIWAH TETEPASAN Pikolih tetilikan puniki kalaksanayang antuk kramaning tetilik sane marupa kramaning dokumentasi. Kramaning puniki kalaksanayang anggen ngrereh data sane mapaiketan sareng tetilikan sane wenten ring SD se-kecamatan Jembrana. Ring Kecamatan Jembrana puniki wenten 4 Kelurahan lan 6 Desa inggih punika Kelurahan Dauhwaru, Kelurahan Pendem, Kelurahan Sangkaragung, Kelurahan Loloan Timur, Desa Budeng, Desa Batuagung, Desa Yeh Kuning, Desa Air Kuning, Desa Perancak miwah Desa Dangin Tukadaya. Ring tetilikan puniki akeh SD sane jagi katilikin inggih punika 20 SD. Ring ajeng sampun kawedarang data sane mautama mapaiketan sareng bantang pikobet lan tetujon tetilik. Data punika indik sukating aksara Bali sane wenten ring sesuratan aksara Bali ring Jembrana, kaiwangan Sesuratan Pasang Aksara Bali ring sesuratan Jembrana lan kawentenan ringkesan ring Jembrana. Tatiga data punika sajangkepnyane pacang katelatarang ring sor puniki. Pikolih kapertama ngenenin indik sukating aksara Bali sane wenten ring sesuratan aksara Bali ring Jembrana. Wangun sesuratan aksara Bali punika wenten sane sampun kasengguh nguda taler wenten sane sampun kasengguh wayah. Sesuratan aksara Bali sane kasengguh nguda punika aksara Bali sane kirang miwah durung becik, nanging yening aksara Bali sane kasengguh wayah punika aksara Bali sane wangun aksaranyane sampun becik. Wangun sesuratan aksara Bali taler kasengguh becik yening aksara punika sampun mawentuk ngwindhu utawi mematan titiran (Antara, 2009: 7). Ri kala nyurat aksara Bali kaaptiang mangda nginutin sukat/sukating aksara Bali, punika mawinan sadurung nyurat aksara Bali mangda uning sukat/sukating aksara Bali sane patut. Wangun sesuratan aksara Bali sane wenten ring papan wasta SD se-kecamatan Jembrana punika wenten sane sampun nginutin sukat/sukating aksara Bali taler wenten sane durung nginutin sukat/sukating aksara Bali. Aksaraaksara sane durung nginutin sukating aksara Bali minakadi Ulu, Pepet, Surang, Taleng/taling, Tedong, Suku, Bisah, Adeg-adeg, Gantungan ta, Gantungan da, Gantungan ja, Gantungan ka, Suku kembung, Guwung lan Carik siki miwah carik kalih. Manut Tim Penyusun Pedoman Pasang Aksara Bali, (2002: 59) sukating aksara sane patut ngenenin indik aksaraaksara ring ajeng inggih punika: (1) Ulu patut kasurat apacraken kirang. Ring sesuratan aksara Bali sane wenten ring papan wasta SD se- Kecamatan Jembrana punika ulu sampun kasurat apacraken kirang taler wenten kasurat kirang saking apacraken kirang lan wenten sane kasurat apacraken lintang. Akehnyane ulu sane kapanggihin ring sesuratan papan wasta SD se- Kecamatan Jembrana inggih punika 35. Sesuratan ulu sane sampun kasurat apacraken kirang akehnyane 19, sane kasurat kirang saking apacraken kirang akehnyane 15 lan sane kasurat apacraken lintang akehnyane 1 ulu. (2) Pepet patut kasurat apacraken kirang. Ring sesuratan papan wasta sane wenten ring SD se-kecamatan Jembrana, pepet punika sampun kasurat apacraken kirang taler wenten sake kasurat kirang saking apacraken

7 kirang lan wenten sane kasurat apacraken lintang. Akehnyane pepet sane kapanggihin ring papan inggih punika 81. Sesuratan pepet sane sampun kasurat apacraken kirang wenten 42, sane kasurat kirang saking apacraken kirang wenten 38 lan sane kasurat apacraken lintang wenten 1. (3) Surang patut kasurat tigang craken tedun. Ring sesuratan aksara Bali sane wenten ring papan wasta SD se-kecamatan Jembrana punika surang sampun kasurat tigang craken tedun taler wenten kasurat kirang saking tigang craken tedun lan wenten sane kasurat lintang saking tigang craken tedun. Akehnyane surang sane inggih punika 26. Sesuratan surang sane sampun kasurat tigang craken tedun akehnyane 18, sane kasurat kirang saking tigang craken tedun akehnyane 6 lan sane kasurat lintang saking tigang craken tedun akehnyane 2. (4) Taleng/taling patut kasurat kalih craken kirang. Ring sesuratan aksara Bali sane wenten ring Jembrana punika taleng/taling sampun kasurat kalih craken kirang taler wenten kasurat kirang saking kalih craken kirang lan wenten sane kasurat lintang saking kalih craken kirang. Akehnyane taleng/taling sane inggih punika 42. Sesuratan taleng/taling sane sampun kasurat kalih craken kirang akehnyane 30, sane kasurat kirang saking kalih craken kirang akehnyane 6 lan sane kasurat lintang saking kalih craken kirang akehnyane 6. (5) Tedong patut kasurat apacraken kirang. Ring sesuratan aksara Bali sane wenten ring Jembrana punika tedong sampun kasurat apacraken kirang taler wenten kasurat kirang saking apacraken kirang lan wenten sane kasurat lintang saking apacraken kirang. Akehnyane tedong sane inggih punika 25. Sesuratan tedong sane sampun kasurat apacraken kirang akehnyane 13, sane kasurat kirang saking apacraken kirang akehnyane 7 lan sane kasurat lintang saking apacraken kirang akehnyane 5. (6) Suku patut kasurat kalih craken. Ring sesuratan aksara Bali sane wenten ring papan wasta SD se-kecamatan Jembrana punika suku sampun kasurat kalih craken taler wenten kasurat kalih craken kirang. Akehnyane suku sane inggih punika 37. Sesuratan suku sane sampun kasurat kalih craken akehnyane 31, sane kasurat kalih craken kirang akehnyane 6. (7) Bisah patut kasurat kalih craken tedun. Ring sesuratan aksara Bali sane wenten ring papan wasta SD se-kecamatan Jembrana punika bisah sampun kasurat kalih craken tedun taler wenten kasurat kirang saking kalih craken tedun lan wenten sane kasurat lintang saking kalih craken tedun. Akehnyane bisah sane kapanggihin ring sesuratan Jembrana inggih punika 30. Sesuratan bisah sane sampun kasurat kalih craken tedun akehnyane 24, sane kasurat kirang saking kalih craken tedun akehnyane 4 lan sane kasurat lintang saking kalih craken tedun akehnyane 2. (8) Adeg-adeg patut kasurat tigang craken tedun. Ring sesuratan aksara Bali sane wenten ring Jembrana punika adeg-adeg sampun sami kasurat tigang craken tedun. Akehnyane adeg-adeg sane inggih punika 22. (9) Gantungan ta patut kasurat apacraken kirang. Ring

8 sesuratan aksara Bali sane wenten ring Jembrana punika gantungan ta sampun kasurat apacraken kirang taler wenten kasurat kirang saking apacraken kirang lan wenten sane kasurat lintang saking apacraken kirang. Akehnyane gantungan ta sane kapanggihin ring sesuratan Jembrana inggih punika 4. Sesuratan gantungan ta sane sampun kasurat apacraken kirang akehnyane 2, sane kasurat kirang saking apacraken kirang akehnyane 1 lan sane kasurat lintang saking apacraken kirang akehnyane 1. (10) Gantungan da patut kasurat apacraken kirang. Ring sesuratan aksara Bali sane wenten ring papan punika gantungan da sampun kasurat apacraken kirang taler wenten kasurat kirang saking apacraken kirang lan wenten sane kasurat lintang saking apacraken kirang. Akehnyane gantungan da sane kapanggihin ring sesuratan Jembrana inggih punika 8. Sesuratan gantungan da sane sampun kasurat apacraken kirang akehnyane 2, sane kasurat kirang saking apacraken kirang akehnyane 4 lan sane kasurat lintang saking apacraken kirang tedun akehnyane 2. (11) Gantungan ja patut kasurat apacraken kirang. Akehnyane gantungan ja sane kapanggihin ring sesuratan papan wasta SD se- Kecamatan Jembrana inggih punika 1 lan punika kasurat lintang saking apacraken kirang. (12) Gantungan ka patut kasurat apacraken kirang. Akehnyane gantungan ka sane inggih punika 1 lan punika kasurat lintang saking apacraken kirang. (13) Suku kembung patut kasurat duang craken. Akehnyane suku kembung sane kapanggihin ring papan wasta SD se-kecamatan Jembrana inggih punika 1 lan punika kasurat duang craken kirang. (14) Guwung patut kasurat duang craken. Ring sesuratan aksara Bali sane wenten ring Jembrana punika guwung sampun kasurat duang craken taler wenten sane kasurat duang craken kirang lan kasurat duang craken lintang. Akehnyane guwung kapanggihin ring sesuratan papan wasta SD se- Kecamatan Jembrana inggih punika 9. Sesuratan guwung sane sampun kasurat duang craken akehnyane 6, sane kasurat duang craken kirang akehnyane 3 lan sane kasurat duang craken lintang akehnyane 2. (15) Carik siki patut kasurat apacraken. Ring sesuratan aksara Bali sane wenten ring papan wasta SD se- Kecamatan Jembrana punika carik siki sampun kasurat apacraken taler wenten sane kasurat apacraken kirang lan kasurat apacraken lintang. Akehnyane carik siki sane inggih punika 47. Sesuratan carik siki sane sampun kasurat apacraken akehnyane 12, sane kasurat apacraken kirang akehnyane 18 lan sane kasurat apacraken lintang akehnyane 17. (16) Carik kalih patut kasurat apacraken. Ring sesuratan aksara Bali sane wenten ring papan punika carik kalih sampun kasurat apacraken taler wenten sane kasurat apacraken kirang lan kasurat apacraken lintang. Akehnyane carik kalih sane kapanggihin ring sesuratan papan wasta SD se- Kecamatan Jembrana inggih punika 18. Sesuratan carik kalih sane sampun kasurat apacraken akehnyane 6, sane kasurat apacraken kirang akehnyane 2 lan sane kasurat apacraken lintang akehnyane 10. Manut panelataran baduur sesuratan aksara sane pinih akeh nenten nginutin sukat/sukating aksara Bali inggih punika sesuaratan pepet mawinan ring sesuratan

9 papan wasta punika akeh nyurat pepet sane kirang saking apacraken kirang, wenten sesuratan pepet punika alit pisan lan sesuratannyane punika sakadi sesuratan ulu miwah wenten sane nenten kasurat mematan titiran. Ring sesuratan papan wasta sane wenten ring SD se-kecamatan Jembrana puniki akeh wangun aksaranyane nenten nginutin sukating aksara Bali. Puniki sane ngranayang sesuratannyane kacingak nenten becik lan nenten resik, lian ring punika sesuratannyane ngaryanang sang sane ngwacen bingung. Imbanyane sakadi sesuratan pepet lan ulu punika wenten sane kasurat pateh, sesuratan taleng/taling lan adegadeg wenten sane kasurat pateh miwah sane lianan. Pikolih kaping kalih inggih punika ngenenin indik kaiwangan sesuratan Pasang Aksara Bali ring sesuratan papan wasta SD se- Kecamatan Jembrana. Sajeroning nyurat aksara Bali mangda nginutin uger-uger nyurat aksara Bali sane kabaos Pasang Aksara Bali (Tim Penyusun Pedoman Pasang Aksara Bali, 2002: 2). Ri kala nyurat aksara Bali punika nenten wenang madaging spasi, nanging akeh sesuratan aksara Bali ring papan puniki sesuratannyane kari madaging spasi. Akeh papan wasta SD se-kecamatan Jembrana sane madaging spasi inggih punika 15 SD. Yening nyurat angka punika patut kaapit carik siki, nanging yening angka punika magenah ring arep utawi anggen ngawitin lengkara angka punika nenten kaapit carik siki utawi carik siki punika kaanggen ring ungkur manten (Subandia, 2011: 77). Ring sesuratan papan wasta SD se-kecamatan Jembrana punika akeh sesuratan angka Bali sane nenten kaapit olih carik siki. Akeh papan wasta ring SD se-kecamatan Jembrana sane sesuratan angka nenten kaapit carik siki inggih punika 16 SD. Carik kalih utawi carik pareren kaanggen ri kala muputang sesuratan aksara Bali utawi kasurat ring ungkur kruna miwah lengkara (Subandia, 2011: 81). Ring papan wasta sane wenten ring SD se- Kecamatan Jembrana puniki akeh sane nenten madaging carik kalih ri kala muputang sesuratan aksara Bali. Akeh papan wasta ring SD se- Kecamatan Jembrana sane nenten madaging carik kalih inggih punika 15 SD. Selanturnyane yening nyurat aksara Bali mangda nginutin ugeruger nyurat aksara Bali. Minakadi nyurat kruna Dauhwaru punika patut nyurat sakadi pengucapannyane. Adeg-adeg punika nenten wenang kasurat ring tengahing kruna/lengkara yening kruna nenten matumpuk tiga miwah yening nenten ngaryanang bingung lan sakadi kruna Sangkaragung punika nenten wenang nganggen cecek ring tengahing kruna. Akeh papan wasta sane nyurat aksara Bali nenten nginutin Pasang Aksara Bali inggih punika 10 SD. Manut panelataran baduur kaiwangan sane pinih akeh kapolihang ring papan wasta SD se- Kecamatan Jembrana inggih punika nyurat angka nenten kaapit antuk carik siki. Pikolih kaping tiga inggih punika kawentenan ringkesan ring Jembrana. Ring aab sakadi mangkin sane kawastanin aor tanpa wates puniki wenten sane kawastanin ringkesan anyar/modern. Ringkesan anyar puniki kasurat kaapit antuk carik siki (Subandia, 2011: 73). Nanging kari wenten kaiwangan ri kalaning nyurat ringkesan anyar puniki minakadi sesuratannyane nenten kaapit carik siki lan ri kala wenten aksara suara (vokal) patut nganggen aksara suara Swalalita. Akeh SD sane iwang ri kala nyurat

10 ringkesan punika kapanggihin wenten 3 SD. Ring papan wasta SD se- Kecamatan Jembrana puniki akeh kaiwangan sane kapolihang ri kala nyurat aksara Bali ring papan wasta. Ring soang-soang sekolah punika sampun wenten sesuratan aksara Bali sane nginutin uger-uger nyurat aksara Bali taler wenten SD sane sesuratannyane durung nginutin uger-uger nyurat aksara Bali. Sesuratan sane nenten nginutin uger-uger aksara Bali punika kaiwangan olih sang sane nyurat papan wasta mawinan saking sekolah punika sampun ngicenin sesuratan sane patut sane nginutin uger-uger nyurat aksara Bali nanging ri kala nyurat, sang sane nyurat papan wasta nenten nguratiang uger-uger nyurat aksara Bali sane patut lan becik sakadi sane sampun kaicenin olih soangsoang sekolah punika. PAMUPUT Kawentenan sukating aksara Bali sane wenten ring sesuratan aksara Bali ring papan wasta SD se- Kecamatan Jembrana sampun prasida kabaos becik. Yening kacingak wentuk aksaranyane sampun tegteg, punika nyihnayang sang sane nyurat papan wasta punika sinah sampun waged nyurat aksara Bali ring papan wasta. Nanging kantun wenten makudangkudang aksara sane nenten nginutin sukating aksara Bali sane patut yening selehin nginutin Pasang Aksara Bali. Aksara-aksara sane nenten nginutin sukating aksara Bali minakadi nyurat ulu, pepet, surang, taleng/taling, tedong, suku, bisah, adeg-adeg, gantungan ta, gantungan da, gantungan ja, gantungan ka, suku kembung, guwung lan carik siki miwah carik kalih. Kawentenan kaiwangan sesuratan Pasang Aksara Bali ring sesuratan papan wasta SD Se- Kecamatan Jembrana. Akeh kaiwangan sane kapolihang ring Jembrana yening selehin nginutin Pasang Aksara Bali. Kaiwangan punika minakadi nyurat aksara Bali akeh sane nganggen spasi, nyurat angka Bali sane nenten kaapit carik siki miwah kapanggihin nyurat adegadeg ring tengahing lengkara sane kantun prasida kagantungin. Adegadeg punika prasida kasurat ring tengahing lengkara ri tatkala kaanggen ngemanggehang pasang taler ngicalang pasang tumpuk tiga ring sajeroning nyurat aksara Bali. Taler wenten sesuratan sane wayah sampun nginutin Pasang Aksara Bali. Kawentenan ringkesan ring Jembrana kantun wenten sane iwang yening selehin nginutin Pasang Aksara Bali. Kaiwangan punika minakadi sesuratannyane nenten kaapit carik siki miwah aksara suaranyane punika nenten nganggen aksara suara Swalalita. Manut ring pikolih tetilikan ring ajeng, wenten piteket jagi kawedarang inggih punika pikolih tetilik sane sampun kalaksanayang prasida ngicen kaweruhan anggen sesuluh makarya tetilik sane mapaiketan sareng aksara Bali lan Pasang Aksara Bali mangda sayan becik lan jangkep. Malarapan antuk punika kawentenan basa Bali prasida ajeg kantos riwekasan. Tetilikan sane sampun kalaksanayang kaaptiang pacang prasida kanggen gamelan utawi sandingan majeng ring tetilikan sane pacang kalaksanayang kawekas tur mangda prasida sayan becik lan pastika mawiguna majeng ring kahuripan krama Bali.

11 KAPUSTAKAAN Achmad, Sri Wintala Buku Induk Mahir Bahasa dan Sastra Indonesia. Yogyakarta: Araska. Antara, I Gusti Putu Kosabasa Bali. Singaraja: Universitas Pendidikan Ganesha. Wendra, I Wayan Buku Ajar Penulisan Karya Ilmiah. Singaraja: Undiksha. Zuriah, Nurul Metodologi Penelitian Sosial dan Pendidikan. Jakarta: PT Bumi Aksara Menulis Aksara Bali di Atas Lontar Sebuah Keterampilan. Makalah ini disajikan dalam Seminar Menulis Aksara Bali di Atas Lontar Sebuah Keterampilan. Denpasar 14 Desember Dalman Penulisan Populer. Jakarta: PT Raja Grafindo Persada. Djuhari, Setiawan dan Suherni Panduan Membuat Karya Tulis. Bandung: Yrama Widya. Medra, Suasta dkk Pedoman Pasang Aksara Bali. Denpasar: Dinas Kebudayaan Provinsi Bali. Nala, Ngurah Aksara Bali dalam Usada. Surabaya: Paramita. Subandia, I Made Pedoman Penulisan Aksara Bali dan Aksara Latin. Jakarta: Azka Mulia Media. Sugiyono Metode Penelitian Bisnis. Bandung: CV Alfabeta. Tinggen, I Nengah Pelik-Pelik Pasang Aksara Bali dan Penulisan Bali pada Papan Nama. Singaraja: Indra Jaya Celah-Celah Kunci Pasang Aksara Bali. Singaraja: Indra Jaya.