SOR SINGGIH BASA BALI SAJERONING PARUMAN BANJAR ADAT GUNUNG BIAU, DESA MUNCAN, KABUPATEN KARANGASEM

Transkripsi

1 SOR SINGGIH BASA BALI SAJERONING PARUMAN BANJAR ADAT GUNUNG BIAU, DESA MUNCAN, KABUPATEN KARANGASEM Ni Luh Pt. Ratna Dewi 1, Md. Sri Indriani 1, I Kt. Paramartha 2 Jurusan Pendidikan Bahasa Bali Universitas Pendidikan Ganesha Singaraja, Indonesia {niluhputuratnadewi@ymail.com, sriindriani6161@yahoo.com, ketutgembel@yahoo.co.id}@undiksha.ac.id Kuub Tetilikan puniki matetujon nlatarang indik (1) kawentenan paruman Banjar Adat Gunung Biau, Desa Muncan, Kecamatan Selat, Kabupaten Karangasem sane mapaiketan sareng kawentenan tutur lan (2) kawentenan sor singgih basa Bali ring paruman Banjar Adat Gunung Biau, Desa Muncan, Kecamatan Selat, Kabupaten Karangasem. Tetilikan puniki nganggen palihan tetilik deskriptif kualitatif. Jejering ring tetilikan puniki, krama Banjar Adat Gunung Biau. Penandang ring tetilikan puniki, sor singgih basa Bali sane wenten ring paruman Banjar Adat Gunung Biau. Kramaning mupulang data ring tetilikan puniki nganggen kramaning pratiaksa lan sadu wicara. Data tureksa sane kanggen inggih punika analisis data deskriptif kualitatif antuk pamargi (1) reduksi data, (2) pangwedar data, lan (3) panyutetan. Pepolih tetilikan puniki inggih punika (1) kawentenan paruman Banjar Gunung Biau sane mapaiketan sareng kawentenan tutur mamargi antar manut kadi napi sane kaaptiang, sane mapaiketan sareng kutus pisarat kawentenan tutur inggih punika setting, pamilet, tetujon tutur, unteng tutur, nada tutur, wentuk tutur, noma tutur, lan sorohan tutur. (2) Kawentenan sor singgih Basa Bali ring paruman inggih punika sajeroning kruna-krunanyane akehan nganggen kruna alus mider lan sajeroning lengkaranyane wenten lengkara alus singgih, alus madia, alus sor lan lengkara andap, taler mapaiketan sareng warna basa saking penutur, saking panganggenyane, saking keformalan, lan saking sarana. Kruna pangalih: sor singgih basa Bali, paruman.

2 Abstrak Penelitian ini bertujuan untuk menjelaskan (1) keadaan rapat di Banjar Adat Gunung Biau, Desa Muncan,Kecamatan Selat, Kabupaten Karangasem yang berhubungan dengan peristiwa tutur dan (2) keadaan sor singgih basa Bali dalam rapat Banjar Adat Gunung Biau, Desa Muncan, Kecamatan Selat, Kabupaten Karangasem. Penelitian ini menggunakan rancangan penelitian deskriptif kualitatif. Subjek penelitian ini adalah masyarakat dari Banjar Adat Gunung Biau. Objek penelitian ini adalah sor singgih basa Bali yang ada dalam rapat Banjar Adat Gunung Biau. Metode pengumpulan data yang digunakan dalam penelitian ini adalah observasi dan wawancara. Metode analisis data yang digunakan adalah analisis data deskriptif kualitatif yaitu dengan cara (1) reduksi data, (2) penyajian data, dan (3) kesimpulan. Hasil penelitian ini adalah (1) keadaan rapat di Banjar Adat Gunung Biau yang berhubungan dengan peristiwa tutur berjalan dengan baik sesuai dengan yang diharapkan, yang berhubungan dengan delapan syarat peristiwa tutur yaitu latar, partisipan, tujuan tutur, topik tutur, nada tutur, bentuk tutur, norma tutur, dan jenis tutur. (2) Keadaan sor singgih basa Bali di dalam rapat yaitu di dalam kata-katanya banyak menggunakan kata alus mider dan dalam kalimatnya menggunakan kalimat alus singgih, alus madia, alus sor, dan kalimat andap, juga berhubungan dengan variasi bahasa dari penutur, dari penggunanya, dari keformalan, dan dari sarana. Kata kunci: sor singgih basa Bali, rapat. Abstract This study aimed to describe (1) the condition of meeting at Banjar Adat Gunung Biau, Muncan Village, Selat District, Karangasem Regency connect with speech even and (2) the condition of sor singgih basa Bali in the meeting at Banjar Adat Gunung Biau, Muncan Village, Selat District, Karangasem Regency. This study was designed by using descriptive qualitative research. The subjects were the people of Banjar Adat Gunung Biau. The object of this study was sor singgih basa Bali in the meeting at Banjar Adat Gunung Biau. The data collection methods used in this study is the observation and interview. Data analysis method used is descriptive qualitative data analysis which consists of (1) data reduction, (2) presentation of data, and (3) conclusion. The result of the study shows that (1) the condition of meeting at Banjar Adat Gunung Biau was well as expected, which is associated with eight terms of speech even that is setting and scene, participants, ends, act sequence, key, instrumentalities, norm of interaction and interpretation, and genre. (2) The condition of sor singgih basa Bali in the meeting, the words many used Alus mider word and the sentence using the phrase Alus singgih, Alus madia, Alus sor, and Andap sentence, also associated with language variations of the speakers, users, formality, and tool. Key words: sor singgih basa Bali, meetings. PURWAKA Bali pinaka pulo sane sampun kasub ring duranegara, duaning pulo Bali madue makudang-kudang budaya, kesenian, kaasrian, taler parisolah sadhu budhi krama Bali sane prasida ngardi kawentenan pulo Bali sane luih. Kabudayaan sane wenten ring Bali pinaka tetamian saking leluhur sane ngantos mangkin kamargiang. Manut Tylor (ring Tilaar, 1999: 39) kabudayaan inggih punika kaweruhan, kawiaktian, seni, budi, kerta, miwah adatistiadat sane kapolihang olih i manusa dados krama. Kabudayaan Bali wiaktinyane madue kasuksmaan sane dahat luih ring kauripan krama Bali, inggih punika prasida ngwetuang rasa masikian lan rasa manyama braya. Silih sinunggil kabudayaan Bali sane kantun lan kamargiang ngantos mangkin inggih punika paruman (sangkep). Paruman inggih punika genah silih sinunggil sekaa (organisasi) krama Baline mabebaosan indik pikobet sane wenten ring krama adat Bali. Sajeroning paruman, krama Bali prasida nyikiang kayun anggen nyawis pikobet sinalih tunggil krama utawi krama sami. Ring paruman taler genah

3 krama Bali masadu ajeng, mabebaosan kanggen nyutetang pamargi sane pacang kalaksanayang. Makudang-kudang tata-titi patut kauratiang sajeroning paruman mangda paruman prasida mamargi antar lan labda karya, silih sinunggilnyane basa, basa sane kanggen nenten ja lian wantah basa Bali. Basa Bali inggih punika basa sane kanggen mabebaosan olih jadma Baline, ring wewidangan kulawarga, pakraman lan ring sekolah. Basa Bali taler silih sinunggil Basa daerah ring Indonesia sane masor singgih. Bebaosan antuk basa Bali wenten sor utawi singgih saking wirasan kruna-krunanyane. Bebaosan sane masor singgih kabaos sor singgih basa Bali. Sor singgih basa Bali inggih punika rasa basa sane kanggen olih jadma Bali anggen nyihnayang rasa undausuk ring sajeroning mabebaosan majeng anak lian sane patut kasinggihang utawi kasorang rumasuk ngasorang dewek. Mabebaosan nganggen basa Bali nginutin sor singgih basa Bali punika mabuat pisan, duaning sor singgih basa Bali prasida ngawigunang kruna sane patut manut ring unda-usuk (Suarjana, 2007:61). Lianan punika ri kalaning mabebaosan yening rasa basa sane kanggen sampun paripurna, sampun manut ring sor singgih basa Bali, pacang prasida ngwetuang kayun sang mireng ledang. Yening rasa basa sane kanggen ri kalaning mabebaosan nenten manut ring sor singgih basa Bali, janten pacang ngwetuang bebaos senglad. Duaning asapunika sajeroning nincapang kaweruhan mabaos antuk basa Bali, silih sinunggil sane dahat mabuat inggih punika rasa basanyane. Aab kadi mangkin, basa Bali sane nginutin sor singgih basa sampun arang kanggen ring krama Bali, napi malih ring kauripan utawi ring kahanan formal sakadi ring paruman (rapat). Sor singgih basa Bali sane kanggen durung anut ring uger-uger ri tatkala ngaturang kayun utawi pamineh sajeroning paruman, kahanan punika ngawinang napi sane kaunggahang nenten prasida anut ring kayun sang sane mirengang. Sangkaning punika panilik ngamargiang tetilik indik sor singgih basa Bali sajeroning paruman Banjar Adat Gunung Biau, Desa Muncan, Kecamatan Selat, Kabupaten Karangasem. Panilik ngamargiang tetilik ring Banjar Adat Gunung Biau duaning, sauning panilik durung wenten tetilik sane nilikin indik sor singgih basa Bali ring sajeroning paruman ring Banjar Adat Gunung Biau, taler Banjar Adat Gunung Biau nampek saking genah panilik. Malarapan antuk punika panilik kengin uning indik kawentenan sor singgih basa Bali ring krama, cutetnyane sajeroning paruman Banjar Adat Gunung Biau. Tetujon tetilik puniki mangda prasida nlatarang indik kawentenan miwah kahanan paruman lan sor singgih basa bali ring paruman Banjar Adat Gunung Biau, Desa Muncan, Kecamatan Selat, Kabupaten Karangasem. Manut Arikunto (2005: 59) kawentenan dasar tetimbangan mabuat pisan, duaning prasida ngwantu panilik muputang tetiliknnyane. Dasar tetimbangan sane kawedarang mangda madue paiketan tekening dadalan pikobet. Ring tetilik puniki wenten makudang-kudang dasar tetimbangan sane kanggen, inggih punika, (1) teori sosiolingustik, (2) sor singgih basa Bali, miwah (3) pahan sor singgih basa Bali. (1)Teori Sosiolinguistik kanggen ring tetilik puniki, santukan teori puniki mapaiketan tekening pangangge basa ring krama, cutetnyane pangangge sor singgih basa Bali sane wenten ring paruman. Kruna sosiolinguistik mawit saking kruna sosio sane mateges krama miwah kruna lingustik sane mateges wedaran basa (kajian bahasa), dadosnyane sosiolingistik inggih punika wedaran basa sane mapaiketan sareng kawentenan krama (Sumarsono lan Partana, 2004: 1). Sosiolinguistik pinaka widya sane mlajahin basa miwah pangangge basa ring sajeroning krama (Chaer lan Agustina 1995: 3). Manut makekalih panampen punika prasida kacutetang, sosiolinguistik inggih punika widya sane mlajahin indik basa lan paiketannyane sareng kauripan kramane sarahina-rahina (kehidupan sosial). Nababan (1991: 2) maosang sosiolinguistik pinaka wedaran basa paiketannyane sareng penutur basa pinaka krama. Pinaka krama ipun kaiket olih nilai-nilai sosial miwah nilai-nilai budaya, rumasuk nilai-nilai ri tatkala nganggen basa. Ring krama Bali silih sinunggil nilai-nilai punika sane setata

4 ngiket inggih punika sor singgih basa Bali ri tatkala mabebaosan, cutetnyane ring paruman. Suasta (2001: 9) nguningayang anggah-ungguhing basa Bali silih sinunggil uger-uger sane dahat mabuat ring sajeroning mabebaosan basa Bali. Sor singgih basa Bali punika nyihnayang linggih sane wenten ring krama Baline sane ketah kabaos antuk wangsa. Wangsa punika pinaka dasar kawentenan sor singgih basa ring Bali, lianan punika sane ngawinang kawentenan sor singgih basa ring Bali inggih punika tata krama sane wenten ring krama Baline. Kawentenan sakadi punika ngawinang wentennyane tata krama ri tatkala mabebaosan, punika sane ngawinang wentennyane rasa nyinggihang saking sang sane mabebaosan sareng sang sane kairing mabebaosan. Kawentenan punika salanturnyane ngawinang metunyane sor singgih basa ring basa Bali. Ring teori sosiolinguistik wenten kekalih bebaosan sane mapaiketan sareng sor singgih basa Bali lan paruman, inggih punika: (a) kawentenan tutur, lan (b) warna basa. (a) Kawentenan tutur nyihnayang bebaosan kalih utawi akeh jadma, sane dados sang mabebaosan lan sang sane kairing mabebaosan ngeninin parindikan, ring galah, genah lan kahanan. Ring sajeroning kawentenan tutur wenten makudang-kudang pisarat sane patut kauratiang, manut saking Dell Hymes (1972) (ring Chaer lan Agustina, 1995: 62) nyihnayang wenten kutus pisarat ring sajeroning kawentenan tutur, inggih punika setting, pamilet, tetujon tutur, unteng tutur, nada tutur, wentuk tutur, norma tutur, lan sorohan tutur. Manut saking Chaer lan Agustina (1995: 80) kawentenan warna basa sangkaning sang sane mabaos malianan, taler pakaryan sane kalaksanayang masiosan. Wenten makudang-kudang kepahan ring warna basa, inggih punika, (1) warna basa saking penutur, (2) warna basa saking panganggenyane, (3) warna basa saking keformalan, miwah (4) warna basa saking sarana. (3) Manut Suasta (2001: 9) undangundagan basa ring sajeroning basa Bali kasengguh anggah-ungguhing basa Bali sane sampun karesmiang olih Pasamuhan Agung (Loka Karya) Basa Bali III warsa 1974 ring Singaraja. Sadurungnyane wenten makudang-kudang parinama anggen maosang undagan-undagan basa punika, minakadi: Masor Singgih, Sor Singgih Basa Bali, Kasar-Alus, Undagundagan Basa, lan Warna-warna Basa. Sakewanten saking parinama punika sane katah kanggen ring krama Baline inggih punika sor singgih basa Bali. Sor singgih basa Bali inggih punika rasa basa sane kanggen olih jadma Bali anggen nyihnayang rasa unda-usuk ring sajeroning mabebaosan majeng anak lian sane patut kasinggihang utawi kasorang rumasuk ngasorang dewek. Manut Medra dkk. (2003: 8) mungguhing rasa basanyane sane mabuat pisan rasa basa krunakrunanyane, santukan kawentenan lengkara miwah basa puniki dasarnyane wantah kruna-kruna. Kaweruhan ring rasa basa kruna-kruna basa Bali pacang prasida nincapang kaweruhan mababaos nganggen basa Bali nginutin sor singgih basa Bali. Malarapan rasa basa kruna-kruna basa Bali kaepah dados petang soroh, inggih punika: (1) kruna alus, (2) kruna mider, (3) kruna andap, (4) kruna kasar (Suwija, 2008: 7). Lengkara inggih punika pupulan kruna sane madue teges sampun jangkep. Kawentenan lengkara basa Bali majanten kawangun antuk kruna-kruna sane masor-singgih sakadi sampun katlatarang ring ajeng. Duaning asapunika lengkara-lengkara sane metu taler madue wirasa masios-siosan manut ring kruna-kruna sane ngwangun lengkara punika. Duaning wenten krunakruna sane wirasannyane maendahan, lengkara alus umpamnnyane nenten ja makasami kruna-krunane saking kruna sane alus. Asapunika taler lengkara madia, miwah sane lianan. Malarapan antuk rasa basanyane, lengkara sajeroning basa Bali kaperang dados lelima, inggih punika: lengkara alus singgih, lengkara alus madia, lengkara alus sor, lengkara andap, miwah lengkara kasar (Suwija, 2008: 14). KRAMANING TETILIK Manut Sukardi (2007: 71) kawentenan kramaning tetilik mabuat pisan, panilik mangda tatas nlatarang kramaning tetilik, punika nyihnayang panilik tatas ring bantang pikobet miwah ngamargiang kramaning tetilik sane anut ring bantang pikobetnyane. Wendra (2011: 52)

5 nguningayang kramaning tetilik inggih punika tata cara sane kanggen ring sajeroning tetilik. Manut ring panampen punika prasida kacutetang kramaning tetilik inggih punika tata cara utawi paridabdab sane kalaksanayang sajeroning tetilik. Wenten makudang-kudang paridabdab ring kramaning tetilik, inggih punika palihan tetilik, jejering miwah penandang tetilik, kramaning mupulang data, piranti tetilik, lan data tureksa. Palihan tetilik ring tetilikan puniki inggih punika deskriptif kualitatif. Data sane kapolih pacang katlatarang malarapan antuk basa sane lengut. Wendra (2011: 53) nguningayang sadurung ngwedarang indik jejering miwah penandang tetilik patut dumun kawedarang indik genah tetilik. Kadasarin antuk panampen punika, dadosnyane sane dados genah tetilik ring tetilik puniki inggih punika Balai Banjar Adat Gunung Biau, Desa Muncan, Kecamatan Selat, Kabupaten Karangasem. Manut Wendra (2011: 53) jejering tetilik inggih punika jadma sane maparilaksana (dikenai tindakan). Jejering tetilik mautama pisan, duaning saking jejering panilik kapolihang data. Saking panampen punika, dadosnyane ring tetilik puniki sane dados jejering tetilik inggih punika krama banjar sane nyarengin paruman ring Banjar Adat Gunung Biau, Desa Muncan, Kecamatan Selat, Kabupaten Karangasem. Penandang tetilik inggih punika sane dados katureksain. Antuk punika sane dados penandang tetilik ring tetilik puniki, inggih punika sor singgih basa Bali sane wenten ring paruman Banjar Adat Gunung Biau, Desa Muncan, Kecamatan Selat, Kabupaten Karangasem. Manut Satori lan Komariah (2013: 46) sampel inggih punika pahan sane rumpit (bagian kecil) saking populasi sane kambil manut uger-uger sane prasida ngangganin populasi punika. Yening populasinyane akeh, lan panilik nenten prasida nilikin makasami sane wenten ring populasi, umpaminyane duaning keterbatasna dana, bayu (tenaga), lan galah, dadosnyane panilik prasida nganggen sampel sane kaambil saking populasi (Sugiyono, 2013: 118). Malarapan antuk panampen punika panilik nganggen sampel ri tatakala nilikin tetilikan puniki. Sugiyono (2013: 120) maosang simple rendom sampling inggih punika pengambilan sampel kalaksanayang antuk clogcag (acak). Tata cara puniki kamargiang yening anggota populasinyane pateh (homogen). Puniki awinan ring tetilikan puniki ngamargiang simple rendom sampling. Kramaning mupulang data madue tetujon sane dahat utama sajeroning tetilik sane nentuang mapikolih utawi nentennyane tetilik punika. Manut Arikunto (2005: 100) kramaning mupulang data inggih punika tata cara mupulang data sane kanggen olih panilik. Data inggih punika gatra sane kapolihang ring genah tetilik (Bungin, 2006: 133). Data punika dados marupa aksara lan gatra sane kanggen nyawis pikobet sane katilik. Tata cara sane kanggen mupulang data ring tetilik puniki inggih punika pratiaksa (observasi) miwah sadu wicara (wawancara). Piranti tetilik inggih punika piranti sane kanggen olih panilik ring sajeroning mupulang data mangda prasida mamargi antar lan labda karya (Trianto, 2011: 263). Majalaran antuk panampen punika, piranti tetilik madue kawigunaan anggen memilah data sane kapolih saking tetilik. Santukan kramaning mupulang data sane kanggen ring tetilik puniki wantah pratiaksa miwah sadu wicara, dadosnyane pinaka piranti tetilik puniki mapaiketan sareng pratiaksa miwah sadu wicara. Ring sajeroning pratiaksa piranti sane kanggen inggih punika, buku catatan, handphone, miwah kamera. Handphone lan kamera punika kanggen ngrereh gambar lan ngerekam ri tatkala paruman punika mamargi. Yening ring sadu wicara piranti tetilik sane kanggen inggih punika, buku catatan, miwah bolpoin, piranti puniki kanggen nyatet pikolih saking sadu wicara, Ring tetilik puniki taler nganggen kartu data sane kanggen mupulang tur nureksain kruna sane wenten ring paruman Banjar Adat Gunung Biau, wenten kalih kartu data sane kanggen. Sesampune data mapupul, salanturnyane data katureksain (dianalisis). Bogdan (ring Trianto, 2011: 286) maosang, analisis data adalah proses mencari serta menyusun secara sistematis data yang diperoleh dari hasil wawancara, observasi, catatan lapangan, dan bahan-bahan lain

6 sehingga mudah dipahami agar dapat diinformasikan kepada orang lain. Malarapan antuk panampen punika, data tureksa inggih punika proses nyusun data mangda data punika elah katureksain. Data tureksa puniki kanggen nyutetang fokus penelitian. Ring tetilik puniki nganggen teknik analisis data deskritif kualitatif, santukan ring tetilik puniki datanyane kapolihang antuk pratiaksa lan sadu wicara. Teknik analisis data deskritif kualitatif puniki kanggen nyihnayang sor singgih basa Bali sane wenten ring paruman Banjar Adat Gunung Biau. Manut Miles lan Huberman (ring Trianto, 2011: 286) maosang pamargi ring data tureksa kualitatif kaepah dados tigang baga, inggih punika, reduksi data, pangwedar data, panyutetan (penarikan kesimpulan). Tetilik puniki taler nganggen tigang pamargi data tureksa kualitatif punika. PIKOLIH lan TETEPASAN Ring pikolih lan tetepasan puniki pacang kauningangyang data sane sampun kapalih, kasorohang lan katureksain. Pikolih saking tetilikan puniki minakadi (1) kawentenan paruman ring Banjar Adat Gunung Biau, Desa Muncan, Kecamatan Selat, Kabupaten Karangasem sane mapaiketan sareng kawentenan tutur taler (2) kawentenan sor singgih basa Bali ring paruman Banjar Adat Gunung Biau, Desa Muncan, Kecamatan, Selat, Kabupaten Karangasem. Banjar Adat Gunung Biau punika magenah ring Desa Muncan, Kecamatan Selat, Kabupaten Karangasem. Ring Banjar puniki kantun ngamargiang budaya paruman sane kalaksanayang nyabran rahina Redite Umanis. Mangda kauningin kawentenan paruman ring Banjar Adat Gunung Biau sampun kamargiang sadu wicara duk Redite Umanis Ukir tanggal 17 Mei 2015 majeng kelihan Banjar Adat Gunung Biau. Sadu wicara puniki kalaksanayang majeng ring kelihan Banjar Adat Gunung Biau sadurunge paruman mamargi. Sadu wicara puniki kamargiang mangda uning indik kawentenan paruman Banjar Adat Gunung Biau. Piranti sane kanggen ring sajeroning ngamargiang sadu wicara puniki inggih punika buku catatan miwah bolpoin. Saking tetilikan sane sampun kalaksanayang parsida kauningin yening kawentenan paruman ring Banjar Adat Gunung Biau mamargi antar manut kadi napi sane kaaptiang. Tetujon nglaksanayang paruman ring Banjar Adat Gunung Biau mangda ngamolihang paum lan prasida muputang pikobet sane wenten ring sajeroning krama Banjar Adat Gunung Biau. Manut sakadi dasar tetimbangan sane kanggen bantang nyawis pikobet ring tetilikan puniki, inggih punika teori linguistik cutetnyane ring kawentenan tutur. Manut saking Dell Hymes (1972) (ring Chaer lan Agustina, 1995: 62) nyihnayang wenten kutus pisarat ring sajeroning kawentenan tutur, inggih punika setting, pamilet, tetujon tutur, unteng tutur, key, wentuk tutur, norms, lan sorohan tutur. Indik kawentenan puniki prasida kauningin ring tetepasan ring sor. (Panglingsir 1) Inggih santuakan umur tiange sampun lintang, sampun makelo ngayah, titiang jagi nglungsur mapamit.(kelihan Banjar) Malih wenten malih, paling nyen We?.(Wayan Jablah) Tiang Wayan Jablah. (Kelihan Banjar) Nyoman Srinata, Nengah Miasih, Jata payu?. (Panglingsir 2) Payu. (Kelihan banjar) Pak Suarta sing ada nden, nggih niki nak patuta ampun nyada, yen yusa enem dasa tiban, ampunang ampun maosang anak ampun lintang, yening porem rasanin, ngalih kurenan ngidaang bin We? We Jablah ngidaang? Ken kelihan ken Beli Sribek?. (Panglingsir 1) Meyaban titiang. (Kelihan Banjar) Yen nyada puniki usan masegeh, mangkin ngajuang dumun, usan masegeh bakta surate. Pang ten nyanan baosanga ring desa. Niki ampun telug bulan liwat, jantos bin kedne nyan aba suratne. Ampunang nika baosanga malih, niki tiang mutusang usan masegeh, pang maan ngayah bin jebos, niki bin mani ada teka tiang tampung dumun. Dimesegehe mone nyada, karena ampun uger-uger di desa kenten. Nemonin Nyepi, nerag utawi nyada seusan Nyepi, masegeh dumun. Mangda polih paica, nunas drika, mapamit drika secara sekala niskala, durusang nika sausan masegeh.

7 Ring bebaosan ring ajeng yening selehin ring sajeroning kawentenan tuturnyane prasida kauningayang sakadi, galah lan genah (setting): bale banjar Adat Gunung Biau Desa Muncan, Kecamatan Selat, Kabupaten Karangasem, ring galah semeng sawatara galah Wita. Pamilet (partisipant): krama Banjar Adat Gunung Biau cutetnyane prajuru-prajuru tempek miwah panglisngsir-panglingsir tempek. Tetujon tutur (ends): maosang indik panyadaan. Unteng tutur (act sequence): nguningayang indik sor singgih basa Bali sane kanggen mabebaosan. Nada tutur (key): ngamedalang panampen miwah paweweh nganggen bebosan sane becik, lengut lan nenten bangras ri tatkala mabebaosan. Instrumentalities: pamargin paruman nagnggen bebaosan. Norma tutur (norms): makasami pamilet paruman mapupul masadu ajeng tur negak masila. Sorohan tutur (genre): basa sane kanggen inggih punika basa paruman sane nganggen basa Bali masor singgih. Ngeninin indik kawentenan tutur ring sajeroning paruman, sajangkepnyane prasida kauningayang sakadi, ring sor. Ngenenin indik genah miwah galah (setting) saking paruman Banjar Adat Gunung Biau inggih punika ring bale Banjar Adat Gunung Biau, Desa Muncan, Kecamatan Selat Kabupaten Karangasem ring galah semeng sawatara galah Wita. Bale banjar ring Bali ketah kanggen genah ngamargiang sahaning parikrama (acara formal) ring wewidangan banjar, duaning asapunika ring paruman pastika nganggen basa sane sampun kacumawisang, inggihan punika basa Bali sane nginutin sor singgih basa Bali. Paruman ring Banjar Adat Gunung Biau kasarengin (participants) olih krama Banjar Adat Gunung Biau cutetnyane olih prajuru-prajuru tempek miwah panglingsirpanglingsir tempek, puniki sangkaning krama Banjar Adat Gunung Biau akeh sawatara 512 KK, yening makasami rauh sinah genahnyane kosek. Paruman kabungkah olih kelihan Banjara Adat Gunung Biau miwah kasarengin olih prajuru-prajuru tempek miwah panglingsirpanglingsir tempek, indik kapengurusan Banjar Adat Gunung Biau prasida kauningin sakadi, kelihan banjar: Drs. I Nengah Sumerta, Wakil kelihan banjar: I Gede Maharta, panyarikan: Drs. I wayan Dana, juru raksa: I Wayan Sukrayasa, prajuru tempek 1: I Wayan Sribek, prajuru tempek 2: I Nengah Kaler, prajuru tempek 3: I Nengah Suarta, prajuru tempek 4: Made Sudi. Ring paruman tetujon tutur pastika matetujon muputang pikobet lan ngamolihang paum. Paruman sane sampun mamargi duk Redite Umanis Ukir punika maosang indik arta dana, miwah pamargipamargi (program-program) sane sampun mamargi miwah sane pacang kamargiang olih Banjar Adat Gunung Biau. Pamargipamargi sane sampun mamargi inggih punika ngeninin indik toya, wewangunan Pura Pusah, Bale Agung miwah LPD. Pamargi-pamargi sane pacang mamargi inggih punika wewangunan pura pamlastian Yeh Sah miwah ngenenin indik genah ngutang luu. Unteng Tutur (act sequences) sajeroning paruman ring bale banjar majanten sampun nganggen basa Bali alus sane masor singgih basa, pamekasnyane sor singgih basa Bali ring paruman. Sor singgih basa Bali kanggen nyihnayang rasa unda usuk ring sajeroning mabebaosan majeng sang sane patut kasinggihang utawi kasorang rumasuk ngasorang dewek. Ring sajeroning mabebaosan ring paruman, pastika baose kametuang suara sane becik, lengut, banban lan nenten bangras (key). Punika kalaksanayang mangda baosan sane kauncarang olih sang sane mabaos prasida katampenin olih sang sane kairing mabebaos. Yening sapunika sinah paruman mamargi becik kadi napi sane kaaptiang. Paruman sane kalaksanayang olih Banjar Adat Gunung Biau duk punika wantah paruman sane nganggen suara ri tatkala ngunggahang pikayunan. Yening sampun nganggen suara (instrumentalities) pastika nyaratang basa sane kametuang. Maosang indik basa ring paruman, sinah nagggen basa sane sampun kacumawisang inggih punika basa Bali sane nginutin sor singgih basa Bali. Yening maosang indik etika (norms), puniki mapaiketan sareng parilaksana sang sane nyarengin paruman, punika mangda

8 becik anut ring tata krama. Anut ring tata krama punika sakadi negak mesila, nenten uyut, miwah nguratiang napi sane kabaosang ring paruman. Yening maosang etika maparilaksana sinah kasarengin antuk etika mabebaosan sane becik nginutin sor singgih basa Bali, sakadi nguncarang: Om, Swastiastu, suksma antuk galah sane kapaice, nawegang dumun nyelah galah abos-bos, Om, Santhi, Santhi, Santhi, Om. Punika sampun nyihnayang tata krama iraga ri tatkala mabebaosan. Kawentenan paruman ring Bali punika mapaiketan pisan sareng basa (genres) sane marupa narasi sane nganggen basa paruman sane madaging sor singgih basa Bali. Punika mawinang yening sampun mabebaosan ring paruman pastika warna basa sane kanggen mabebaosan punika nganutin sor singgih basa Bali. Taler wenten marupa mantra sakadi, Om, Swastiastu puniki kauncarang ring pamahbah baos lan ri kala muputang baos kaunggahang mantra Om, Shanti, Sahanti, Shanti, Om. Pepolih lan pabigbagan sane kaping kalih ngenenin indik kawentenan sor singgih basa Bali ring paruman Banjar Adat Gunung Biau. Risampune panilik ngamargiang pratiaksa, prasida kapolihang data ngeninin indik kawentenan sor singgih basa Bali ring paruman Banjar Adat Gunung Biau. Saking data punika nyihnayang sajeroning mabebaosan ring paruman nganggen basa Bali sane masor singgih. Yening maosang basa pastika nenten lempas saking kruna lan lengkaranyane sane nyusun basa punika. Manut Medra dkk. (2003: 8) mungguhing rasa basanyane sane mabuat pisan rasa basa krunakrunanyane, santukan kawentenan lengkara miwah basa puniki dasarnyane wantah kruna-kruna. Kaweruhan ring rasa basa kruna-kruna basa Bali pacang prasida nincapang kaweruhan mababaos nganggen basa Bali nginutin sor singgih basa Bali. Malarapan rasa basa kruna-kruna basa Bali kaepah dados petang soroh, inggih punika kruna alus, kruna mider, kruna andap, miwah kruna kasar (Suwija, 2008: 7). Saking kruna-kruna prasida ngwangun lengkara alus utawi siosan. Duaning asapunika sadurung nilikin lengkaranyane pinih riin katilikin kruna-krunanyane. Saking tetilik nyihnayang akehan nganggen kruna alus mider ri tatkala mabebaosan ring paruman Banjar Adat Gunung Biau, minakadi kruna: inggih, sareng, sami, pamekas, prajuru tempek, muah sane lianan. Risampune nyelehin rasa basa ring kruna-krunanyane kalanturang nyelehin rasa basa lengaranyane. Lengkara inggih punika pupulan kruna sane madue teges sampun jangkep. Kawentenan lengkara basa Bali majanten kawangun antuk krunakruna sane masor-singgih sakadi sane wenten ring tabel ring ajeng. Duaning asapunika lengkara-lengkara sane metu taler madue wirasa masios-siosan manut ring kruna-kruna sane ngwangun lengkara punika. Duaning wenten kruna-kruna sane wirasannyane maendahan, lengkara alus umpamnnyane nenten ja makasami krunakrunane saking kruna sane alus. Asapunika taler lengkara madia, miwah sane lianan. Malarapan antuk rasa basanyane, lengkara sajeroning basa Bali kaperang dados lelima, inggih punika lengkara alus singgih, lengkara alus madia, lengkara alus sor, lengkara andap, miwah lengkara kasar (Suwija, 2008: 14). Lengkara sane kanggen ring sajeroning paruman punika wenten nganggen lengkara alus singgih, alus sor, alus madia taler wenten lengkara andap, puniki kapatutang manut ring konteks lengkara sane kauncarang olih sang mabebaos. Ring sor puniki, pacang katlatarang data indik sor singgih basa Bali cutetnyane ring sajeroning lengkara sane kanggen ri tatkala mabebaosan ring paruman Banjar Adat Gunung Biau. Indik punika prasida kauningin ring tetepasan ring sor. Kelihan banjar: (1) Inggih Ida dane sareng sami, niki paweweh indik margi, wyakti tahun niki tenderne durus, sane madue jero ring pinggir margi siap-siap dumun, terutama got-got sane tertutup, wenten wewangunan punika sampunang ampun banget maosang. (2) Yening durus tendernya, niki Karangasem nak mula clegas-clegus, saget meriki ten kentenanga, nyan mrika baktana. Titiang nawegang, yen pet prade wenten, ngiring sarengin, patuta

9 bongkar, kenkenang hak benaina kentenang manten kramane yen wenten mamengkung. (3) Wenten ngenahang bus bongkar dumun, bongkar niki ten tanggungtanggung malih, nganggen bego ane ageng. (4) Nika yen ngrereh becik, kacingakin got-got sane ten berfungsi maksimal, mawinan ring sabehe ten nyidayang nglintang, terus terang kemanten ten ngidayang nglintang. Inggih wantah kadi punika atur titiang, nah kirang langkung empat puluh lima menit titiang maatur-atur ring Ida dane sareng sami. (5) Pangranjingan sampun wenten, pet prada wenten nenten manut arsa ring sajeroning parareman kadi mangkin, titiang sareng sami prajuru nglungsur ampura banget. Dumogi sangkaning sapangrauh Ida dane sareng sami langgeng ngamargiang ayah-ayah ring Banjar Adat Gunung Biau. (6) Inggih kirang langkung sineb titiang antuk parama santhi Om Santhi Santhi Santhi Om. Bebaosan ring lengkara (5) Pangranjingan sampun wenten, pet prada wenten nenten manut arsa ring sajeroning parareman sakadi mangkin, titiang sareng sami prajuru nglungsur ampura banget. Yening selehin ring rasa basa krunanyane kadi ring sor. Pangranjingan sampun wenten, pet prada wenten nenten manut arsa ring sajeroning parareman sakadi mangkin, titiang sareng sami prajuru nglungsur ampura banget. Makasami kruna-kruna puniki rumasuk kruna alus mider sajabaning kruna titiang lan nglungsur puniki rumasuk kruna alus sor. Manut Suwija (2008: 15) lengakara alus sor sering kawangun antuk kruna alus sor, kruna alus mider, kruna mider lan kruna andap. Manut penampen punika lengkara ring ajeng rumasuk lengkara alus sor, duaning rasa basa krunanyane kasusun antuk kruna alus mider lan kruna alus sor (Ami lan Aso). Ring lengkara nenten nguratiang rasa basa lengkaranyane kemanten, nanging taler ring efektivitas lengkaranyane. Puniki wenten lengkara sane durung anut, sakadi ring sor. Niki ampun telung bulan liwat, jantos bin kedne nyan aba suratne. (Lengkara 8, Bebaosan 2). Ring lengkara puniki wenten nganggen kruna basa Indonesia ring kruna bulan lan surat, kruna puniki prasida kagentosin antuk kruna sasih lan sewala patra. Taler kruna telung, nyan lan ne punika mangda lengkaranyane prasida komunikatif kagentosin antuk kruna tigang, nyanan lan nyane. Lengkaranyane dados kadi ring sor. Niki ampun tigang sasih liwat, jantos bin kedne nyanan aba susewala patanyane. Dadosnyane lengkara puniki rasa basa lengkaranyane nganggen lengkara alus madia. Yen nyada puniki usan masegeh, mangkin ngajuang dumun, usan masegeh bakta surate. (Lengkara 7, Bebaosan 2) Ring lengkara puniki wenten nganggen kruna basa Indonesia ring kruna surat, kruna puniki prasida kagentosin antuk kruna sewala patra, yening asapunika dadosnyane rasa basa lengkaranyane lengkara alus madia. Manut sakadi dasar tetimbangan sane kanggen bantang nyawis pikobet ring tetilikan puniki, inggih punika indik teori sosiolingustik cutetnyane ring warna basa. Manut saking Chaer lan Agustina (1995: 80) kawentenan warna basa sangkaning sang sane mabaos malianan, taler pakaryan sane kalaksanayang masiosan. Wenten makudang-kudang kepahan ring warna basa, inggih punika warna basa saking penutur, warna basa saking panganggenyane, warna basa saking keformalan, lan warna basa saking sarana Saking penuturnyane ring paruman punika malinan. Napi punika ring yusanyane, pendidikannyane, pakaryan lan status sosialnyane. Pabinayan punika ring penutur sane banget kapanggihin ring paruman Banjar Adat Gunung Biau. Saking yusa sane malianan, wenten anak lingsir, anak kelih (dewasa). Taler ring pakaryan sane malianan. Yadiastun saking penuturnyane sane malianan, nanging nenten banget wenten warna basanyane, duaning wenten uger-uger sane ngiket, sane patut kasungkepim (dipatuhi) olih makasami pamilet paruman, uger-uger puniki inggih punika sor singgih basa Bali ring paruman. Warna basa saking panggennyane, basa puniki kanggen ring kawentenan formal inggih punika ring paruman,

10 sangkaning punika basa sane kanggen inggih punika basa Bali sane masor singgih. Manut saking Martin Jos (1967) (ring Agustin lan Chaer, 1995: 93) warna basa saking keformalan wenten limang soroh inggih punika: ragam baku, ragam resmi utawi formal, ragam usaha, ragam santai miwah ragam akrab. Saking limang soroh warna basa saking keformalan punika, paruman rumasuk ring ragam resmi utawi formal. Duaning rumasuk ring ragam ragam resmi utawi formal basa sane kanggen pastika basa Bali sane anut ring sor singgih basa Bali. Paruman sane kalaksanayang olih Banjar Adat Gunung Biau duk punika wantah paruman sane nganggen suara (lisan) ri tatkala ngunggahang pikayunan. Yening sampun nganggen suara pastika nyaratang basa sane kametuang. Maosang indik basa ring paruman, sinah nagggen basa sane sampun kacumawisang inggih punika basa Bali sane nginutin sor singgih basa Bali. PAMUPUT Kawentenan paruman ring Banjar Adat Gunung Biau sane mapaiketan sareng kawentenan tutur kasinahang paruman mamargi antar manut kadi napi sane kaaptiang. Kawentenan paruman ring Banjar Adat Gunung Biau prasida kauningin ring kutus pisarat sajeroning kawentenan tutur inggih punika, setting, pamilet, tetujon tutur, unteng tutur, nada tutur, wentuk tutur, norma tutur, lan sorohan tutur. Kawentenan sor singgih basa Bali ring paruman Banjar Adat Gunung Biau inggih punika ring sajeroning paruman Banjar Adat Gunung Biau, rasa basa kruna-kruna sane kanggen mabebeaosan akehan nganggen rasa basa kruna alus mider. Ring rasa basa lengkaranyane wenten nganggen lengkara alus singgih, alus sor, alus madia, taler wenten sane nganggen lengkara andap. Taler wenten kaiwangan-kaiwangan lengkaranyane sane durung anut ring sor singgih basa Bali, sakadi kruna sineb sapatutnyane kanggen kruna puputang anggen mututang baos. Taler wenten makudang-kudang lengkara kasusun antuk kruna basa Indonesia punika prasida kagentosin antuk kruna basa Bali mangda anut ring sor singgih basa Balinyane.Taler mapaiketan sareng warna basa saking panutur, panganggenyane, keformalan, lan sarana. Manut pikoleh tetilikan sane sampun tetikesang ring ajeng wenten makudangkudang piteket sane prasida kauningayang, inggih punika majeng ring panilik lianan, panilik ngaptiang sumangdane ipun prasida nglanturang nilikin indik kawentenan sor singgih basa Bali ring paruman lan majeng ring para pangwacen, panilik ngaptiang sumangdane ipun nelebin malih indik sor singgih basa Bali. Yening sampun makasami teleb mabebaosan anut ring sor singgih basa Bali sinah pacang ngawinang rasa unda usuk majeng sang mabebaosan, cutetnyane ring paruman taler ring wewidangan sane jimbar. KAPUSTAKAAN Arikunto, Suharismi Manajemen Penelitian. Jakarta: PT Rineka Cipta. Bungin, Burhan Metodologi Penelitian Kuantitatif. Jakarta: Kencana Prenada Media Group. Chaer, Abdul dan Leonie Agustina Sosiolinguistik Perkenalan Awal. Jakarta: PT Rineka Cipta. Medra, I Nengah dkk Imba Mabebaosan Nganggen Basa Bali. Denpasar: Dinas Kabudayaan Propinsi Bali. Nababan, P.W.J Sosiolingustik Suatu Pengantar. Jakarta: PT Gramedia Pustaka Utama. Partana, Paina dan Sumarsono Sosiolinguistik. Yogyakarta: Lembaga Studi Agama, Budaya dan Perdamaian. Satori, Djam an dan Aan Komariah Metodologi Penelitian Kualitatif. Bandung: Alfabeta. Suarjana, I Nyoman Putra Sor Singgih Basa Bali. Denpasar. Tohpati Grafika Utama. Suasta, Ida Bagus Made Berpidato dengan Bahasa Bali. Denpasar: Fakultas Sastra Universitas Udayana. Sugiyono Metodelogi Penelitian Pendidikan. Bandung: Alfabeta.

11 Sukardi Metodologi Penelitian Pendidikan. Jakarta: PT Bumi Aksara. Suwija, Ni Nyoman Anggahungguhing Basa miwah Sastra Bali. Denpasar: Dinas Pendidikan Provinsi Bali. Tilaar, H.A.R Pendidikan Kebudayaan dan Krama Madani Indonesia. Bandung: PT Remaja Rosdakarya. Trianto Pengantar Penelitian bagi Pengembangan Profesi Pendidikan Tenaga Kependidikan. Jakarta. Kencana Prenada Media Group. Wendra, I Wayan Buku Ajar Penulisan Karya Ilmiah. Singaraja: Universitas Pendidikan Ganesha.