BUPATI KULONPROGO WEDHAR SABDA WONTEN ING ACARA NAMPI RAWUHIPUN PANGARSANING YAYASAN DANA SEJAHTERA MANDIRI, LP3M UST YOGYAKARTA LAN PAMARENTAH KABUPATEN BOYOLALI ING POSDAYA ANISA PEDUKUHAN IV GARONGAN, PANJATAN Wates, 26 Maret 2011 Assalamu alaikum Wr. Wb. Mugi kawilujengan, kasarasan saha karaharjan tansah kajiwa kasalira kula lan panjenengan sedaya. Ingkang kinormatan, Bapak Prof. Dr. Haryono Suyono pangarsaning Yayasan Dana Sejahtera Mandiri, Pangarsaning LP3M UST Yogyakarta saha rombongan, Pangarsaning Pamarentah Kabupaten Boyolali saha rombongan, Sedherek Camat Panjatan, Bapak-Ibu tamu undangan sarta sedaya para rawuh ingkang kebak ing suka basuki. Langkung rumiyin sumangga kula dherekaken manengku puja L.TopTos/Sambt11/Maret/KunjunganPosdayaAnisaPanjatan 1
ngaturaken agunging panuwun syukur Alhamdulillah wonten ngarsanipun Allah SWT, Gusti Ingkang Maha Wikan, awit paringanipun berkah lan inyahipun, saengga kula lan panjenengan sedaya taksih dipun keparengaken makempal ing papan punika kangge nindakaken acara Nampi Rawuhipun Pangarsaning Yayasan Damandiri, LP3M UST Yogyakarta, lan Pamarentah Kabupaten Boyolai ing Posdaya Anisa Pedukuhan IV Garongan, Panjatan, Kulonprogo, kanthi remen ing manah. Awit naminipun warga masyarakat Panjatan, ugi Pamarentah Kabupaten Kulonprogo, kula ngaturaken sugeng rawuh kairing raos matur nuwun dumateng ngarsanipun Yayasan Dana Sejahtera Mandiri, LP3M UST Yogyakarta, lan rombongan saking Pamarentah Kabupaten Boyolali, awit kawigatosanipun dumateng Posdaya Anisa Panjatan, Kulonprogo punika. Para rawuh ingkang kinormatan, Kula lan panjenengan uningani, bilih Posdaya mujudaken forum komunikasi, silaturrahmi, advokasi, penerangan lan pawiyatan, ugi mujudaken papan kangge menggalihaken bab keluarga kanthi sesarengan. Semantena Posdaya menawi saget L.TopTos/Sambt11/Maret/KunjunganPosdayaAnisaPanjatan 2
badhe dipun ngrembakaaken dados satunggiling peladosan utaminipun ing babagan kasarasan, pawiyatan, wirausaha, lan ing babagan wewengkon, saengga keluarga saget ngrembaka kanthi mandiri. Posdaya ugi saget dipun leksanaaken kanthi ngginaaken Posyandu, awit Posyandu punika saget migatosaken babagan kasarasan, gizi lan ekonomi warga masyarakat. Posdaya ugi nyengkuyung wontenipun pemberdayaan dumateng keluarga, tumrapipun kangge lare-lare ingkang yuswanipun dereng 15 taun, keluarga ingkang estrinipun nembe nggerbeni, keluarga ingkang kagungan putra remaja ing sak ngandhaping 25 tahun, lan keluarga ingkang kagungan putra sampun dewasa. Posdaya ugi saget madeg kanthi panyengkuyung ingkang keluarganipun sampun sepuh utawi lansia, sae kangge forum silaturrahmi punapa dene kagem caos kalodhangan dateng para lansia mbiyantu keluarga ingkang langkung enem, lan suwalikipun. Upaya pemberdayaan ingkang badhe dipun leksanaaken ing programipun Posdaya ingkang dipun tujokaken kangge nyengkuyung ginanipun keluarga ing babagan agami, budaya, L.TopTos/Sambt11/Maret/KunjunganPosdayaAnisaPanjatan 3
katresnan ing sesami, reproduksi lan kasarasan, pawiyatan, ekonomi lan wewengkon. Posdaya punika dipun deg aken saha dipun leksanaaken dening warga lan kempalan masyarakat, kadosdene kempalan sosial, pengurus Masjid, Panti Asuhan lan sanes-sanesipun. Madegipun Posdaya punika saget dipun pandhegani dening satunggiling lembaga pawiyatan kadosdene pesantren/gereja/wihara/sekolah ingkang para siswa/santrinipun dipun wucal dening para guru/ustad/pastor, salah satunggiling conto ingkang saget dipun wucalaken, bilih tetulung dumateng sesami punika sampun mbenten-mbentenaken agami. Posdaya ugi dipun sengkuyung dening Pamarentah Kabupaten, aparatur ing tataran kecamatan, desa, pedukuhan, RT/RW, namung mboten dipun keparengaken ngangge embelembel partai politik. Ancas tujuanipun program Posdaya punika kangge nglestantunaken budaya bangsa ingkang sae, inggih punika wontenipun gotong-royong lan raos kekeluargaan ingkang rumaket adhedasar Pancasila. Kanthi wontenipun Posdaya punika dipun suwun saget mumpangati saha mahanani tumraping gesangipun warga masyarakat, saengga pinanggih masyarakat L.TopTos/Sambt11/Maret/KunjunganPosdayaAnisaPanjatan 4
ingkang kajagi kasarasanipun sae jasmani punapa dene rohaninipun, kiat ekonominipun, pinter generasi mudanipun saengga sak mangkenipun saget mbangun bangsa lan negarinipun, saha pinanggih masyarakat ingkang ayom, ayem, tentrem lan bagya mulya. Kula aturaken ugi, bilih Posdaya ing Kabupaten Kulonprogo punika saget ngrembaka kanthi sae, antawisipun ing Kecamatan Temon wonten 55 (seket gangsal) Posdaya, ing Kecamatan Panjatan wonten 103 (Setunggal atus Tiga), ing Kecamatan Pengasih wonten 100 (Setunggal atus). Lan pinanggih wonten ing 3 (tiga) kecamatan punika Camatipun putri, saengga Posdaya saget ngrembaka kanthi sae. Awit para Camat putri punika langkung gampil, caket lan rumaket dateng para anggotanipun Posdaya, ingkang saperangan ageng ibu-ibu. Saklajengipun, dumateng para rawuh sedaya, sae saking Yayasan Damandiri, LP3M UST Yogyakarta, punapa dene Pamarentah Kabupaten Boyolali anggenipun badhe kagungan kersa, sumangga katur ing sak mangkenipun pinanggih kaliyan para pengurus Posdaya Anisa ingkang sampun sumadya ing papan punika. Semanten lan mekaten ingkang saget kula aturaken, mbok L.TopTos/Sambt11/Maret/KunjunganPosdayaAnisaPanjatan 5
bilih wonten atur ingkang mboten mranani penggalih nyuwun samodraning pangaksami. Mugi-mugi Gusti Ingkang Maha Wikan tansah paring berkah lan inayahipun kangge kula lan panjenengan sedaya. Amin. Matur nuwun. Wassalamu alaikum Wr. Wb. BUPATI KULONPROGO H. TOYO SANTOSO DIPO L.TopTos/Sambt11/Maret/KunjunganPosdayaAnisaPanjatan 6