BUPATI KULONPROGO WEDHAR SABDA WONTEN ING ACARA PAGELARAN RINGGIT TOPENG WONTEN ING UPACARA ADAT REBO PUNGKASAN BENDUNG KHAYANGAN NGRANCAH, PENDOWOREJO, GIRIMULYO Wates, 02 Februari 2011 Assalamu alaikum Wr. Wb. Mugi karaharjan, kawilujengan lan kasarasan tansah Kajiwa kasalira kula panjenengan sami. Ingkang kinormatan, Camat sarta unsur Muspika Kecamatan Girimulyo, Kepala Desa Pendoworejo saha Perangkatipun, Bapak/Ibu tamu undangan sarta para rawuh kakung sumawana putri ingkang tansah L.TopTos/Sambt11/Feb/WayangTopengReboPungkasan 1
winantu ing suka Basuki. Langkung rumiyin keparenga kula ndherekaken panjenengan sedaya manengku puja ngunjukaken puja-puji syukur Alhamdulillah wonten ngarsanipun Allah SWT, Gusti Ingkang Maha Kuwaos, bilih wonten ing titi wanci punika, kula panjenengan sami taksih kaparingan rahmat saha inayah, saengga kula panjenengan sami taksih dipun keparengaken makempal saha silaturrahmi wonten ing papan punika kangge ngleksanaaken saha hamriksani Acara Pagelaran Ringgit Topeng wonten ing Upacara Adat Saparan Rebo Pungkasan Bendung Khayangan ing Ngrancah, Pendoworejo, Girimulyo, kanthi kebak ing kawilujengan. Kula ngaturaken agenging panuwun dumateng Panitya Upacara Adat Saparan Rebo Pungkasan Bendung Khayangan saha sedaya sedherek ingkang sami nyengkuyung, saengga acara punika saget L.TopTos/Sambt11/Feb/WayangTopengReboPungkasan 2
lumampah kanthi sae lan rancak. Mugi-mugi acara punika sageda mumpangati sarta mahanani tumraping guyup rukun, greget lan grengsengipun para sedherek sedaya anggenipun sami nindakaken mawerni-werni pembangunan. Bapak-Ibu saha para rawuh ingkang satuhu bagyomulyo, Upacara Adat Saparan Rebo Pungkasan Bendung Khayangan punika mujudaken satunggiling acara ingkang kebak ing pangertosan kangge ngetingalaken raos panuwun syukur wonten ngarsanipun Gusti Ingkang Maha Kuwaos, inggih awit sampun kaparingan mapinten-pinten rahmat saha karaharjan. Mugi-mugi kanthi wontenipun acara upacara adat saparan lan sedaya rerangkenipun, warga masyarakat ing mriki, tansaya sengkut gumregut anggenipun makarya ingkang dipun kantheni ulet, prigel saha semangat ingkang L.TopTos/Sambt11/Feb/WayangTopengReboPungkasan 3
makantar-kantar kangge ningkataken bagya mulyanipun keluarga lan masyarakatipun, saengga ing mangkenipun Desa Pendoworejo tansaya majeng pembangunanipun sae ingkang awujud fisik menapa dene mental spiritualipun. Pramila sumangga kula lan panjenengan sami tansah ngonjukaken puji syukur wonten ngarsa dalem Gusti ingkang Hakarya jagad mugi-mugi tlatah punika tansah winantu ing karaharjan, tata titi tentrem nir ing sakara-kara. Bapak-Ibu saha para rawuh ingkang kinurmatan, Wonten ing kalodhangan punika samangke badhe kabeberaken Ringgit Topeng, pramila kula ngajab pagelaran ing mangkenipun sageda dados panglipur lan pitutur luhur, wewarah saha weweruh dhateng warga masyarakat lan babar pisan sageda ndadosaken tambahing wawasan. L.TopTos/Sambt11/Feb/WayangTopengReboPungkasan 4
Mugi-mugi intisarinipun pagelaran punika saged dipun petik kanthi wijang lan dadosa oboring tumindak. Jer wayang mekaten minangka wewayanganipun tiyang gesang ing alam bebrayan agung sarta seni ingkang inggil drajatipun ingkang kebak patuladhan sae, kangge kaca benggoloning agesang. Bapak-Ibu saha para rawuh ingkang dahat kinurmatan Saklajengipun, wonten kalodhangan ingkang mirunggan punika keparenga kula caos uninga, bilih wonten ing warsa 2011 punika Kabupaten Kulonprogo badhe nidakaken Pemilukada ingkang badhe milih pangarsaning pamarentahan ing Kulonprogo, inggih punika Bupati lan Wakil Bupati. Kanthi mekaten, sumangga wonten ing lampahing Pemilukada, ingkang badhe dipun leksanaaken L.TopTos/Sambt11/Feb/WayangTopengReboPungkasan 5
tanggal 19 Juni 2011 sakmangke, warga masyarakat ingkang sampun nggadhahi hak pilih, kasuwun saged nindakaken pemilihan kanthi leres saha sah. Mekatena ugi kasuwun, anggenipun milih kanthi kalambaran raos manah ingkang murni kangge nemtokaken pangarsaning pamarentah Kabupaten Kulonprogo ingkang amanah. Kanthi mekaten kula pitados, Kulonprogo punika badhe dipun pangarsani dening Bupati lan Wakil Bupati ingkang saged bekta pamarentahan ingkang majeng saha masyarakat ingkang bagya mulya gesangipun. Kangge mangayubagya saha nindakaken tahapan dumugi sak paripurnaning Pemilukada, kula nyuwun dateng sedaya warga Kulonprogo, kalebet warga Desa Pendoworejo mriki, sumangga sami dipun tingkataken raos persatuan, kesatuan, saha guyuping warga, amrih tansah pinanggih ayom, ayem, tata-titi tentrem ing kukuban Kulonprogo mriki. L.TopTos/Sambt11/Feb/WayangTopengReboPungkasan 6
Sumangga kula lan panjenengan sami ningkataken raos handarbeni Kulonprogo, saha bombong birawaning manah dados bangsa Indonesia kanthi tresna dhumateng Kulonprogo sarta tresna dhumateng tanah wutah rah bumi pertiwi Indonesia. Wontenipun semangat Pluralitas Bhinneka Tunggal Ika, sumangga budaya lokal tansah kula lan panjenengan uri-uri. Sumangga sami tansah nglestantunaken budaya Jawi ingkang adiluhung punika, Ojo nganti pasar ilang kumandhange, kedhung ilang banyune, wong Jawa ilang Jawane. Bab-bab mekaten perlu kula aturaken kanthi pangajab sageda nambahi kencenging manah nggayuh Kulonprogo ingkang linangkung majeng wonten wekdal ingkang badhe dhateng. Minangka puput pepuntoning atur, kula ngaturaken sugeng hamriksani pagelaran Ringgit L.TopTos/Sambt11/Feb/WayangTopengReboPungkasan 7
Topeng punika dumugi sak pari purnaning carios. Semanten lan mekaten ingkang saged kula aturaken, menawi wonten kirang saha langkungipun kula nyuwun agunging samodra pangaksami. Matur nuwun. Wassalamu alaikum Wr. Wb. BUPATI KULON PROGO H.TOYO SANTOSO DIPO L.TopTos/Sambt11/Feb/WayangTopengReboPungkasan 8