SESORAH BUPATI SLEMAN WONTENING PAHARGYAN UPACARA RI-DUMADOSIPUN INGKANG KAPING-102 KABUPATEN SLEMAN SURYA : 15 MEI 2018 Assalamu alaikum Wr.Wb. Mugi Kasarasan, karahayon tansah kajiwa kasarira kula penjenengan sami Ingkang satuhu kinurmatan : Gubernur Daerah Istimewa Yogyakarta Ngarsa Dalem Sri Sultan Hamengku Buwana X Ingkang satuhu kinabekten Para sesepuh aji sepuh, saha para satriyaning negari ingkang langkung pana ing pamawas. Ugi mboten katalompen ingkang kula tresnani para kadang anggota Forum Koordinasi Pimpinan Daerah Kabupaten Sleman, lan sagunging tamu sinedhahan, sedaya paraga upacara ingkang sampun kasdu hangrawuhi ngayahi jejibahan menika kanthi greget murih rumaket. 1
Mangga sesarengan kula panjenengan sami mboten katalompen tansah manengku pujo konjuk dhateng Gusti ingkang Maha Agung, ingkang mboten kendhat paring kanugrahan, kanikmatan, sarta rahmat hidayahipun dhumateng kula panjenengan sedaya, satemah ing titi wanci punika Pemerintah lan masyarakat Sleman saged sesarengan mahargya hamengeti Ri-dumadosipun ingkang kaping 102 Kabupaten Sleman. Pramila ing titi wanci ingkang kebak raos bagya mulya menika, kula minangka Bupati Sleman ngaturaken Sugeng ambal warsa ingkang kaping-102 Kabupaten Sleman, katur dhumateng sedaya warga masyarakat Sleman Mugi-mugi sinergitas pemerintah Kabupaten Sleman, Pemerintah Pusat, Pemerintah Daerah Daerah Istimewa Yogyakarta, lan ugi dhateng Kabupaten miwah Kota sanesipun sumrambah sedaya masyarakat saged mawujudaken setunggaling kawontenan masyarakat ingkang ngraosaken gesang kanthi makmur, kertaraharja, rumaos ayem tentrem, temata lan andarbeni daya saing pinunjul. Ing wekdal menika kula angambali malih, ajak-ajak lan nyuwun dhumateng sedaya tataran ingkang ngobahaken rodhaning paprentahan saha sedaya masyarakat, supados pengetan ri-dumadosipun kabupaten Sleman menika minangka 2
wekdal ingkang sae kangge naliti kanthi premati diri pribadi kita, saengga saged kangge kaca benggala ingkang tundhonipun saged kangge mecut greget golong-gilig makarya sesarengan, kanthi mantebaken lampah ingkang pas lan trep kangge majengipun Pembangunan ing Sleman. Kula sedaya ngrumaosi bilih pembangunan ingkang sampun dipun lampahi Pemerintah Kabupaten Sleman menika minangka asilipun saking lelampahan pembangunan ingkang mbung-sinambung lan ugi asil integrasi antawisipun pemerintah (birokrasi) kaliyan sektor partikelir lan ugi masyarakat. Wonten ing titi wanci ingkang kebak kabgayan menika, kula minangka bupati lan minangka diri kula pribadi, ngaturaken agunging panuwun dhumateng para manggalaning Pemerintahan ing Sleman nalika semanten, anggota legislatif lan ugi Aparatur Sipil Negara, sedaya masyarakat Sleman, para partikelir, lan ugi Instansi Vertikal ingkang dumunung ing Sleman, ingkang sampun makarya kanthi sak estu kangge majengipun wilayah utawi kukuban lan ugi kangge karta raharjaning masyarakat Sleman. Sagung para rawuh ingkang dhahat kinurmatan. Majengipun kawontenan sosial masyarakat lan ugi Kinerja Penyelenggara Pemerintahan ing Kabupaten Sleman sampun kathah dipun tampi kanthi sae dening Pemerintah 3
Provinsi menapa dene Pemerintah Pusat, ing antawisipun injih menika : Indeks Reformasi Birokrasi Pemerintah Kabupaten Sleman tahun 2017 anut asiling pambiji saking Kementrian Pendayagunaan Aparatur Negara lan Reformasi Birokrasi ingkang ngancik angka 72,81 kategori BB dipun bandingaken realisasi ing tahun 2016 ing angka 69,86. Predikat Laporan Akuntabilitas Kinerja instansi Pemerintah ( LAKIP) Pemerintah Kabupaten Sleman saking target Predikat A saged dumugi Predikat BB Kepemimpinan Birokrasi Pemerintah Kabupaten Sleman kasil pikantuk bebingah penghargaan Leadership Award tahun 2017 saking Kemetrian Dalam Negeri. Penghargaan BKN Award 2017 kategori Pengelola Kepegawaian Terbaik Tingkat Kabupaten/Kota tipe B Lembaga Administrasi Negara (LAN) maringi Penghargaan Inovasi Asdministrasi Negara (INAGARA) dhumateng Kabupaten Sleman 4
Kementrian Dalam Negeri maringi penghargaan Innovative Goverment Award (IGA) tahun 2017 dhateng Kabupaten Sleman kanthi urutan utawi peringkat 7. Penghargaan Kabupaten Sehat Tingkat Pengembangan (Swasti Saba Wistara) saking Kementrian Dalam Negeri Puskesmas Minggir kasil dados juara II Puskesmas Berprestasi tingkat Nasional Taman Tebing Breksi kasil dados juara I tujuan Wisata Baru Terpopuler ing babagan Anugrah Pesona Indonesia 2017 Penghargaan urutan/peringkat 2 Best Smart Governance saking City Asia ingkang dipun paringaken dening Menteri Pariwisata RI. Maneka bebungah utawi penghargaan kasebat temtu kemawon kedah amimbuhi tansaya sengkut anggenipun kula panjenengan sami ngemban jejibahan lan tanggeljawab amargi pakaryan ingkang dipun pikul tansaya kathah, saengga pepinginan ningkataken kinerja, gotong-royong sesarengan, manunggal sedya lan ugi nglarasaken sinergitas sedaya 5
tataran inggih antawisipun Pemerintah Kabupaten Sleman, sedaya masyarakat lan partikelir. Para rawuh sedaya ingkang kula tresnani Irah-irahan utawi tema Ri-dumadosipun Kabupaten Sleman sakmenika DENGAN HARI JADI KE-102 KABUPATEN SLEMAN KITA WUJUDKAN KEHIDUPAN MASYARAKAT YANG MANDIRI DAN BERBUDAYA UNTUK MENDUKUNG SLEMAN SMART REGENCY Murih cepetipun implementasi smart regency perlu enggal dipun wujudaken kangge paring pelayanan publik ingkang langkung sae. Kula nyengkuyung dhumateng sedaya pimpinan perangkat daerah supados ngetrapaken inovasi kangge ningkataken pelayanan publik lan nertibaken administrasi pemerintahan supados langkung anggadahi bobot utawi berkualitas. Ing yuswa ingkang kaping 102, sumangga kita sedaya paring sumbangsih, maneka warni gagasan kangge kabupaten Sleman kanthi greget makantar kangge ningkataken kinerja, supados pembangunan ing sakmangke tuhu sak klangkung sae ingkang nuwuhaken daya mangfa at dhateng sedaya masyarakat saengga amimbuhi kertaraharjaning kukuban Sleman. Mangga sedaya kemawon sesarengan makarya 6
kangge mawujudaken Masyarakat Sleman ingkang langkung kertaraharja, mandiri, berbudaya lan Terintegrasi Sistem E- government tumuju Smart Regency tahun 2021. Sepisan malih, kula ngaturaken agenging panuwun dhumateng pangarsaning DPRD sumrambah sedaya anggota, bapak-ibu Forum Koordinasi Pimpinan Daerah, sedaya manggalaning perangkat daerah lan ugi sedaya masyarakat awit guyupipun ndherek cawe-cawe ngobahaken rodhaning paprentahan lan pembangunan ing Sleman. Mugi-mugi Gusti Ingkang Maha Asih tansah nuntun dhateng kesaenan, lan paring ridho sedaya lampah kula panjenengan sami, ingkang nunggal sedya ningkataken rodhaning paprentahan lan pembangunan daerah supados langkung migunani lan manfa at tumraop sedaya warga masyarakat ing Kabupaten Sleman. Aamiin. Wassalamu alaikum Wr.Wb. Sleman, 15 Mei 2018 7